සැම්බියාවේ වන සතුන් විශාල ප්රමාණයක් ඇන්ත්රැක්ස් රෝගය හේතුවෙන් මියයෑම නිසා එරට බලධාරීන් ජනතාවට දැඩි ලෙස අනතුරු අඟවා තිබෙනවා. මියගිය හිපපොටේමස්ලා, අලි ඇතුන්, මී හරකුන් සහ කිඹුලන් වැනි සතුන්ගේ මස් ආහාරයට ගැනීමෙන් වළකින ලෙසයි ඔවුන් ජනතාවගෙන් ඉල්ලා සිටින්නේ. දැනට ලැබෙන තොරතුරු අනුව, මියගිය සතුන්ගේ මස් ආහාරයට ගත් පුද්ගලයන් 12 දෙනෙකුට මෙම රෝගය වැළඳී ඇති අතර, ඔවුන් මේ වන විට ප්රතිකාර ලබමින් සිටිනවා. මුන්යාමාඩ්සි ගංගා ආශ්රිත ප්රදේශයේ පසුගිය ජූලි මාසයේ සිට සතුන් විශාල සංඛ්යාවක් මෙලෙස මියගොස් ඇති බව ආපදා කළමනාකරණ ඒකකය පවසනවා.
ඇන්ත්රැක්ස් කියන්නේ Bacillus anthracis නම් බැක්ටීරියාව නිසා ඇතිවන රෝගයක්. මෙය පස තුළ වසර ගණනාවක් වුවත් පැවතිය හැකි අතර, සතුන් හරහා මිනිසුන්ට පහසුවෙන් බෝවීමේ හැකියාවක් තියෙනවා. සාමාන්යයෙන් තණකොළ කන සතුන්ට මෙම රෝගය බහුලව වැළඳෙන අතර, හදිසියේ මියයන සතුන්ගේ මස් පරිභෝජනය කිරීම හෝ ඒවා අතපත ගෑම ඉතාම භයානකයි. මේ නිසා බලපෑමට ලක්වූ ප්රදේශවල දඩයම් කිරීම තාවකාලිකව අත්හිටුවීමටත්, සැක සහිත සතුන් ගැන වහාම බලධාරීන්ට දැනුම් දෙන ලෙසත් උපදෙස් ලබා දී තිබෙනවා. මීට පෙර 2011 වසරේදී සහ 2023 වසරේදීත් සැම්බියාවේ මෙවැනිම වසංගත තත්ත්වයන් වාර්තා වී ඇති නිසා, ජනතාව මේ ගැන ඉතාම කල්පනාකාරී විය යුතු බවයි බලධාරීන් නැවත නැවතත් අවධාරණය කරන්නේ.

Discussion & Feedback