යේමනයේ හූති කැරලිකරුවන් විසින් සෞදි අරාබියට එරෙහිව දැඩි ‘මුහුදු අවහිර කිරීමක්’ ප්රකාශයට පත් කර තිබෙනවා. තමන් පාලනය කරන ප්රදේශවල වරායන් සහ ගුවන් තොටුපළවල් සෞදි අරාබිය විසින් වසර ගණනාවක් තිස්සේ අවහිර කර තැබීමට ප්රතිචාරයක් ලෙස මෙම පියවර ගත් බවයි හූති හමුදා ප්රකාශකයා සඳහන් කරන්නේ. විශේෂයෙන්ම රතු මුහුදේ දකුණු දොරටුව ලෙස සැලකෙන බාබ් අල්-මන්දබ් සමුද්ර සන්ධිය හරහා සෞදි නෞකාවලට ගමන් කිරීම තහනම් කිරීමට ඔවුන් පියවර ගෙන ඇති බව වාර්තා වෙනවා. මෙය කලාපීය ආර්ථිකයට සහ ගෝලීය තෙල් ප්රවාහනයට විශාල බලපෑමක් එල්ල කළ හැකි තත්ත්වයක්.
මෙම තීරණයට ප්රතිචාර දක්වමින් සෞදි විදේශ අමාත්යාංශය පවසන්නේ තම නෞකාවල ආරක්ෂාව තහවුරු කර ගැනීමට ජාත්යන්තර නීතියට අනුව අවශ්ය ඕනෑම පියවරක් ගැනීමට සූදානම් බවයි. 2014 වසරේ සිට යේමනයේ පවතින සිවිල් යුද්ධය හේතුවෙන් දැනටමත් ලක්ෂ 1.5කට අධික පිරිසක් ජීවිතක්ෂයට පත්ව ඇති අතර, මිලියන 22කට අධික ජනතාවක් දැඩි මානුෂීය අර්බුදයකට මුහුණ දී සිටිනවා. පසුගිය කාලය පුරාම රතු මුහුදේ වෙළෙඳ නෞකාවලට එල්ල වූ ප්රහාර හේතුවෙන් දැනටමත් ගෝලීය නාවික ගමනාගමනයට බාධා එල්ල වී තිබෙන පසුබිමක, හූතිවරුන්ගේ මෙම නවතම තීරණය තත්ත්වය තවත් උණුසුම් කර තිබෙනවා. ඉදිරියේදී මෙම ගැටුම කෙසේ වර්ධනය වේද යන්න ලෝකයේම අවධානයට ලක්වී තිබෙනවා.

Discussion & Feedback