ලොව පුරා අතිශය ජනප්‍රිය ‘Yellowstone’ කතා මාලාවේ නිර්මාතෘ ටේලර් ෂෙරිඩන්, රසිකයන් බොහෝ දෙනෙක් බලාපොරොත්තුවෙන් සිටි ‘6666’ නමැති ස්පින්-ඕෆ් කතා මාලාව කිසිසේත්ම නිර්මාණය නොකරන බව නිල වශයෙන් ප්‍රකාශ කර තිබෙනවා. ‘Rodeo Time’ පොඩ්කාස්ට් වැඩසටහනකට එක්වෙමින් ඔහු පවසා සිටියේ, තමන් සතු ටෙක්සාස් හි පිහිටි සැබෑ ‘Four Sixes’ ගොවිපොළ පදනම් කරගෙන මෙවැනි ප්‍රබන්ධ කතා නිර්මාණය කිරීමට කිසිසේත්ම අකමැති බවයි. එම ගොවිපොළේ සැබෑ ලෙසම ජීවත් වන සහ වැඩ කරන මිනිසුන්ගේ ගෞරවය ආරක්ෂා කිරීම තමන්ගේ වගකීමක් බවත්, ඔවුන්ගේ ජීවිත නාට්‍යමය කරමින් ප්‍රබන්ධ කිරීම තමන් කරන ලොකුම වැරැද්දක් වනු ඇති බවත් ඔහු වැඩිදුරටත් අවධාරණය කළා.
මීට පෙර ‘Yellowstone’ සිව්වන කතා සමයේදී ජිමී හර්ඩ්ස්ට්‍රම්ගේ චරිතය හරහා මෙම ගොවිපොළ ප්‍රේක්ෂකයන් අතරට පැමිණි අතර, ඒ නිසාම බොහෝ දෙනා මෙම ස්පින්-ඕෆ් කතා මාලාව ගැන විශාල බලාපොරොත්තුවකින් පසු වුණා. කෙසේ වෙතත්, 2020 වසරේදී ආයෝජකයන් පිරිසක් සමඟ එක්ව මෙම ගොවිපොළ මිලදී ගත් ෂෙරිඩන් පවසන්නේ, එය හුදෙක් රූගත කිරීම් සඳහා පමණක් නොව, සැබෑ ජීවිතයේ වැඩ කරන මිනිසුන්ගේ ගෞරවය රැකෙන ස්ථානයක් ලෙස පවත්වාගෙන යාම වැදගත් බවයි. ‘6666’ කතා මාලාව නොපැමිණියත්, ‘1883’, ‘1923’ වැනි ‘Yellowstone’ විශ්වයේ තවත් රසවත් කතා මාලා රැසක් ඉදිරියටත් රසවිඳින්නට ප්‍රේක්ෂකයන්ට අවස්ථාව ලැබෙනු ඇති.
Discussion & Feedback