ඇමරිකානු ධවල මන්දිරයේ පැවැත්වෙන උත්සව සහ දේශපාලන කටයුතු ආවරණය කිරීම සඳහා ප්‍රධාන රූපවාහිනී නාලිකා පහකට නැවතත් අවස්ථාව ලැබී තිබෙනවා. පසුගිය දින කිහිපය පුරාම ධවල මන්දිරය විසින් සී.එන්.එන්. නාලිකාවට පනවා තිබූ තහනම හේතුවෙන් අනෙකුත් ප්‍රධාන නාලිකා ද විරෝධය පළ කරමින් ආවරණ කටයුතුවලින් ඉවත් වී සිටියා. කෙසේ වෙතත්, මේ වන විට එම තත්ත්වය වෙනස් වී ඇති අතර, ඩොනල්ඩ් ට්‍රම්ප් සහ චීන ජනාධිපති ෂී ජින්පින් අතර පැවති හමුවීම්වල දර්ශන නැවතත් රූපවාහිනී තිරවලින් දැකගන්නට ලැබුණා.
මෙම සිදුවීමට මුල් වූයේ ඇමරිකානු දිස්ත්‍රික් විනිසුරු තිමෝති කෙලී විසින් ලබා දුන් නියෝගයක්. සී.එන්.එන්. ඇතුළු මාධ්‍ය ආයතන කිහිපයකට පනවා තිබූ මාධ්‍ය බලපත්‍ර තහනම වහාම ඉවත් කරන ලෙස ඔහු නියෝග කළා. ට්‍රම්ප් පාලනයට එරෙහිව පුවත් වාර්තා කිරීමේ චෝදනාව මත මෙම මාධ්‍ය ආයතනවලට ධවල මන්දිරයට ඇතුළු වීම තහනම් කර තිබුණත්, අධිකරණ තීන්දුවත් සමඟ එම බාධාවන් ඉවත් වුණා. මේ වන විට සී.එන්.එන්. නාලිකාවට නැවතත් සිය රාජකාරි කටයුතු ආරම්භ කිරීමට අවස්ථාව ලැබී ඇති අතර, ඉදිරියේදී පැවැත්වෙන ජාතික ලේඛනාගාරයේ උත්සවය ආවරණය කිරීමේ වගකීම ද ඔවුන්ට පැවරී තිබෙනවා. මෙම සිදුවීම මාධ්‍ය නිදහස සම්බන්ධයෙන් ඇමරිකාවේ ඇති වූ වැදගත් ජයග්‍රහණයක් ලෙසයි බොහෝ දෙනා දකින්නේ.
Discussion & Feedback