මෑතකදී ලොව පුරා බොහෝ දෙනෙක් අත්විඳි සූර්යග්‍රහණයේ උණුසුම පහව යන්නටත් මත්තෙන්, තාරකා විද්‍යා ලෝලීන්ට තවත් අපූරු පුවතක් අසන්නට ලැබෙනවා. ඒ 2027 වසරේදී සිදුවීමට නියමිත සුවිශේෂී සූර්යග්‍රහණ දෙකක් පිළිබඳවයි. විශේෂයෙන්ම 2027 පෙබරවාරි 6 වැනිදා ‘ගිනි වළල්ලක්’ වැනි දර්ශනීය සූර්යග්‍රහණයක් (Annular Solar Eclipse) චිලී, ආර්ජන්ටිනාව සහ බටහිර අප්‍රිකාවේ කොටස්වලට දර්ශනය වීමට නියමිතයි. සඳ සූර්යයා සම්පූර්ණයෙන්ම වසා නොගන්නා නිසා, සූර්යයා වටා දීප්තිමත් ගිනි වළල්ලක් මෙන් දිස්වන මෙම දර්ශනය අතිශය සුන්දර එකක් වේවි.
නමුත් සැබෑ උද්යෝගය ඇත්තේ 2027 අගෝස්තු 2 වැනිදායි. බොහෝ දෙනා මේ වන විටත් මෙය ‘සියවසේ සූර්යග්‍රහණය’ ලෙස හඳුන්වන්නේ එහි ඇති සුවිශේෂී බව නිසයි. එදින සිදුවන පූර්ණ සූර්යග්‍රහණය විනාඩි 6කට අධික කාලයක් පැවතීම විශේෂත්වයක්. දකුණු යුරෝපය, උතුරු අප්‍රිකාව සහ මැදපෙරදිග කලාපවලට මෙය ඉතා හොඳින් දර්ශනය වන අතර, එම කාලගුණික තත්ත්වයන්ද ඉතා යහපත් වනු ඇතැයි අපේක්ෂා කෙරෙනවා. මේ නිසාම ලොව පුරා සිටින තාරකා විද්‍යා ලෝලීන් මේ වන විටත් තම සංචාර සැලසුම් කරමින් සිටිනවා. ඔබත් එවැනි අසිරිමත් අත්දැකීමක් ලබා ගැනීමට කැමති නම්, දැන් සිටම ඒ සඳහා සූදානම් වීම වඩාත් සුදුසුයි.
Discussion & Feedback