ලොව පුරා ජනප්‍රිය ‘වීල් ඔෆ් ෆෝචූන්’ (Wheel of Fortune) වැඩසටහනේ හඬ කැවීම් ශිල්පියෙකු ලෙස කටයුතු කළ ජිම් තෝර්න්ව එම වැඩසටහනෙන් ඉවත් කිරීමට සෝනි පික්චර්ස් ටෙලිවිෂන් ආයතනය පියවර අරන් තියෙනවා. පසුගිය මැයි මාසයේදී ඇමරිකන් එයාර්ලයින්ස් ගුවන් යානයකදී සිදුවූ අපකීර්තිමත් සිදුවීමක් හේතුවෙන් ඔහුට මෙම තීරණයට මුහුණ දෙන්න සිදුවුණා. ගුවන් ගමන අතරතුර ඔහු ළමා අපචාර සම්බන්ධ අදහස් හුවමාරු වන චැට් රූම් එකක ක්‍රියාකාරීව නිරතව සිටිනු වෙනත් මගියෙකු දැක ඒ ගැන පැමිණිලි කිරීමත් සමඟයි මෙම ගැටලුව කරළියට ආවේ. මේ සම්බන්ධයෙන් සිදුකළ පරීක්ෂණයකින් පසුව ඔහුව වහාම ක්‍රියාත්මක වන පරිදි සේවයෙන් පහ කිරීමටයි ආයතනය තීරණය කරලා තියෙන්නේ.
ජිම් තෝර්න් 2011 වසරේ සිට මෙම වැඩසටහන සමඟ සම්බන්ධ වී සිටි අතර, ඔහු වැඩසටහන් කථාංග 2,200කට අධික ප්‍රමාණයකට සිය හඬ දායකත්වය ලබා දී තිබෙනවා. කෙසේ වෙතත්, ඔහුගේ මෙම ක්‍රියාව නිසා වැඩසටහනේ කීර්ති නාමයට හානි සිදුවන බව පවසමින් සෝනි ආයතනය ඔහුව ඉවත් කර තිබෙනවා. ඉදිරියේදී විකාශය වීමට නියමිත නව කථාංග සඳහා මේ වන විටත් වෙනත් අයෙකු ආදේශ කර ඇති බවයි වාර්තා වෙන්නේ. ප්‍රසිද්ධ නිවේදකයෙකු මෙවැනි බරපතළ චෝදනාවකට ලක්වී සේවයෙන් පහ කිරීම බොහෝ දෙනාගේ කතාබහට ලක්වෙලා තියෙනවා.
Discussion & Feedback