ලෝක සිනමාවේ අමරණීය විද්‍යා ප්‍රබන්ධ චිත්‍රපටයක් වන ‘ඒලියන්ස්’ (Aliens) තිරගත වී මේ වන විට වසර 40ක් ගතවෙලා. ජේම්ස් කැමරන්ගේ අධ්‍යක්ෂණයෙන් හැඩවුණු මේ චිත්‍රපටයේ එන අඩි 14ක් උසැති බිහිසුණු ‘ඒලියන් ක්වීන්’ හෙවත් රැජින නිර්මාණය කළේ ස්ටෑන් වින්ස්ටන්ගේ ප්‍රවීණ කණ්ඩායමයි. ෆයිබර්ග්ලාස් සහ රබර් භාවිතයෙන් නිර්මාණය කළ මේ දැවැන්ත රූකඩය පිටුපස තිබුණේ අතිවිශාල කැපවීමක්. අදටත් සිනමා ලෝලීන්ගේ නින්ද නොයන තරමට බියක් ඇති කරන මේ නිර්මාණය ගැන එහි වැඩ කළ ශිල්පීන් වන ෂේන් මහන් සහ ලින්ඩ්සේ මැක්ගෝවන් පසුගියදා අපූරු මතකයන් බෙදාගත්තා.
එංගලන්තයේ පයින්වුඩ් චිත්‍රාගාරයේදී මේ දැවැන්ත රූකඩය නිර්මාණය කරද්දී ඔවුන් මුහුණ දුන් අභියෝග බොහොමයි. විශේෂයෙන්ම එංගලන්තයේ පැවති දැඩි ශීතල සහ තාක්ෂණික ගැටලු මැද ඔවුන් මේ අපූරු නිර්මාණය සිදු කළේ හරිම උද්යෝගයකින්. තරුණ වියේදී මේ වගේ දැවැන්ත ව්‍යාපෘතියකට සම්බන්ධ වෙන්න ලැබීම තමන්ට ලැබුණු ලොකුම වාසනාවක් බවයි ඔවුන් පවසන්නේ. ඇමරිකානු සහ බ්‍රිතාන්‍ය ශිල්පීන් එකතු වෙලා කරපු මේ වැඩේ අදටත් සිනමා ඉතිහාසයේ විශේෂ සන්ධිස්ථානයක් විදිහට සලකනවා. ඒලියන් ක්වීන්ගේ චලනයන් සහ ඇයගේ බිහිසුණු පෙනුම අදටත් ඕනෑම කෙනෙක්ව මවිතයට පත් කරන්න සමත් වෙනවා.
Discussion & Feedback