ශ්රී ලංකා ක්රිකට් කණ්ඩායමේ තුන් ඉරියව් ක්රීඩක දසුන් ශානක මේ දිනවල පැවැත්වෙන කැරිබියන් ප්රිමියර් ලීග් (CPL) තරගාවලියේදී අතිවිශිෂ්ට පිතිකරණයක නිරත වෙමින් වාර්තා පොත් අලුත් කිරීමට සමත් වුණා. ශානක පන්දු 39කින් සිය ශතකය සම්පූර්ණ කළ අතර, එය කැරිබියන් ප්රිමියර් ලීග් ඉතිහාසයේ වාර්තා වූ වේගවත්ම ශතකය ලෙසයි ඉතිහාසයට එක්වුණේ. ඔහු නොදැවී පන්දු 43කදී ලකුණු 121ක් ලබා ගත් අතර, එම ඉනිම හතරේ පහර 8කින් සහ දැවැන්ත හයේ පහර 12කින් වර්ණවත් වුණා. ඔහුගේ ප්රහාරාත්මක වේගය 281.39ක් ලෙස සටහන් වීම විශේෂත්වයක්.
මෙම සුපිරි ඉනිමත් සමඟ ශානක තමන් සතු ශ්රී ලාංකික ක්රීඩකයෙකු විසින් වාර්තා කළ වේගවත්ම විස්සයි විස්ස ශතකයේ වාර්තාව නැවතත් සම කිරීමට සමත් වුණා. මීට පෙර ඇන්ඩ්රෙ රසල්, ටිම් සයිෆර්ට් සහ ෂිම්රන් හෙට්මයර් සතුව තිබූ පන්දු 40ක වාර්තාව බිඳ දමමින් ශානක මෙම දස්කම දැක්වීම ක්රිකට් ලෝලීන්ගේ දැඩි අවධානයට ලක්ව තිබෙනවා. ඔහුගේ මෙම ප්රහාරාත්මක පිතිකරණය නිසා ශානක නියෝජනය කරන ශාන්ත කිට්ස් ඇන්ඩ් නෙවිස් පැට්රියට්ස් කණ්ඩායම ලකුණු 235ක ඉහළ ලකුණු පුවරුවක් නිර්මාණය කර ගත්තා.
පන්දු යැවීමේදීත් දක්ෂතා දැක්වූ පැට්රියට්ස් ක්රීඩකයින් ප්රතිවාදී ශාන්ත ලුසියා කිංග්ස් කණ්ඩායම ලකුණු 98කට දවා ගනිමින් ලකුණු 137ක දැවැන්ත ජයක් ලබා ගැනීමට සමත් වුණා. වයස අවුරුදු 34ක් වන දසුන් ශානකගේ විස්සයි විස්ස ක්රිකට් දිවියේ සිව්වන ශතකය මෙය වන අතර, ඔහු තවමත් ලෝකයේ සිටින භයානකම පන්දු පහරවල් එල්ල කරන පිතිකරුවෙකු බව මෙම ඉනිමෙන් නැවතත් ඔප්පු කර තිබෙනවා.

Discussion & Feedback