ප්‍රවීණ සිනමා අධ්‍යක්ෂ වැනර් හර්සොග්ගේ නවතම සිනමා නිර්මාණය වන ‘බකින් ෆාස්ටර්ඩ්’ (Bucking Fastard) චිත්‍රපටය වැනීසි සිනමා උළෙලේදී ප්‍රේක්ෂකයන්ගේ දැඩි ආදරයට පාත්‍ර වුණා. මෙම චිත්‍රපටය තිරගත වීමෙන් පසු ප්‍රේක්ෂකාගාරය විනාඩි හතහමාරක කාලයක් පුරා අත්පොළසන් දෙමින් මෙම නිර්මාණය අගය කළා. මෙහි ප්‍රධාන චරිත නිරූපණය කරන්නේ හොලිවුඩයේ ජනප්‍රිය සහෝදරියන් දෙපළක් වන කේට් මාරා සහ රූනි මාරා විසින්. ඔවුන් දෙදෙනා එකම සිහින දකින, එකම දේට ආදරය කරන අමුතුම ආකාරයේ සහෝදරියන් දෙදෙනෙකු ලෙසයි චිත්‍රපටයේ පෙනී සිටින්නේ.
චිත්‍රපටයේ රූගත කිරීම් අයර්ලන්තයේදී සිදුවූ අතර, තමන් සැබෑ ජීවිතයේදීත් සහෝදරියන් නිසා මෙම චරිතවලට පිවිසීම ඉතා පහසු වූ බව රූනි මාරා මාධ්‍ය හමුවේදී පවසා තිබුණා. ඔවුන් දෙදෙනා අතර ඇති බැඳීම නිසා චරිතයට අවශ්‍ය එම විශේෂිත සම්බන්ධතාවය ගොඩනගා ගැනීමට වැඩි වෙහෙසක් දරන්නට සිදු වුණේ නැහැ. ඔවුන් සමඟ ඕලන්ඩෝ බ්ලූම් සහ ඩොම්නල් ග්ලීසන් ද රංගනයෙන් දායක වෙනවා. චිත්‍රපටය අවසානයේ කේට් සහ රූනි මාරා ඉතා සතුටින් වැළඳගන්නා දසුන් ප්‍රේක්ෂකයන්ගේ අවධානය දිනා ගත්තා.
එක්සත් රාජධානියේ ජීවත් වූ නිවුන් සහෝදරියන් දෙදෙනෙකුගේ සැබෑ කතාවක් ඇසුරින් නිර්මාණය වූ මෙම චිත්‍රපටය, සමාජයට අනුගත වීමට උත්සාහ කරන කාන්තාවන් දෙදෙනෙකුගේ සංවේදී කතාවක් ලෙස විචාරකයන් හඳුන්වා දෙනවා. හාස්‍යයෙන් පිරුණු කතාවක් ලෙස ආරම්භ වුවත්, චිත්‍රපටය පුරාම මානුෂීය ගුණයන් මනාව ඉස්මතු කිරීමට අධ්‍යක්ෂවරයා සමත් වී තිබෙනවා. වැනීසි සිනමා උළෙලේදී ලැබුණු මෙම උණුසුම් ප්‍රතිචාරත් සමඟ ‘බකින් ෆාස්ටර්ඩ්’ චිත්‍රපටය මේ වන විට සිනමා ලෝලීන් අතර විශාල කතාබහකට ලක්වෙලා තියෙනවා.
Discussion & Feedback