සූර්ය කුණාටු පිළිබඳව කල්තියා අනතුරු ඇඟවීමේ පද්ධතියක් ලෙස ක්‍රියා කරන නාසා ආයතනයේ ‘SunRISE’ මෙහෙයුම සඳහා මීට පෙර යොදා ගැනීමට නියමිතව තිබූ වුල්කන් සෙන්ටෝර් රොකට්ටුව වෙනුවට, ස්පේස්-එක්ස් සමාගමේ ෆැල්කන් හෙවි රොකට්ටුව යොදා ගැනීමට නාසා ආයතනය තීරණය කර තිබෙනවා. මීට පෙර වුල්කන් රොකට්ටුවේ සිදුවූ තාක්ෂණික දෝෂ කිහිපයක් හේතුවෙන් මෙම වෙනස සිදු කර ඇති බවයි වාර්තා වෙන්නේ. මෙම මෙහෙයුම මගින් කුඩා චන්ද්‍රිකා හයක් පෘථිවි කක්ෂයට යවා, සූර්යයාගෙන් නිකුත් වන විකිරණ සහ කුණාටු පිළිබඳව අධ්‍යයනය කිරීමට නියමිතයි.
මෙම චන්ද්‍රිකා පෘථිවියේ සිට කිලෝමීටර් 35,000ක් පමණ ඉහළින් පිහිටි කක්ෂයක ස්ථාපිත කර, විශාල රේඩියෝ දුරේක්ෂයක් ලෙස ක්‍රියා කරමින් සූර්ය පිපිරීම් නිරීක්ෂණය කරනවා. සූර්ය කුණාටු නිසා අභ්‍යවකාශයේ ඇති චන්ද්‍රිකා, සන්නිවේදන පද්ධති සහ අභ්‍යවකාශගාමීන්ට සිදුවිය හැකි හානි අවම කර ගැනීමට මෙම දත්ත ඉතා වැදගත් වෙනවා. ෆැල්කන් හෙවි රොකට්ටුව මගින් මෙම වසර අගභාගයේදී මෙම මෙහෙයුම දියත් කිරීමට නියමිත අතර, එය අභ්‍යවකාශ තාක්ෂණයේ තවත් වැදගත් පියවරක් වනු ඇති බව විද්‍යාඥයින් පවසනවා.
Discussion & Feedback