හොලිවුඩයේ දක්ෂතම රංගන ශිල්පිනියක් වන ඔස්කාර් සහ එමී සම්මානලාභී වයෝලා ඩේවිස්, Paramount+ හරහා එන අලුත්ම ත්‍රාසජනක කතාමාලාවක් වන ‘ඇසෙන්ට්’ (Ascent) සඳහා එකතු වෙන්නයි සූදානම් වෙන්නේ. මේ කතාමාලාව නිර්මාණය කරන්නේ ‘ග්ලැඩියේටර්’ සහ ‘ස්කයිෆෝල්’ වැනි විශිෂ්ට නිර්මාණවලට දායක වුණු ජෝන් ලෝගන් විසින්. මෙහිදී වයෝලා ඩේවිස් නිරූපණය කරන්නේ කැට්‍රියෝනා වේල් නම් ආයතනික ලෝකයේ අභියෝග ජයගන්නා දක්ෂ කාන්තාවකගේ චරිතයක්. ඇගේ දියණිය අනතුරකට ලක්වීමත් සමඟ ඇය තමන්ගේ සියලුම දක්ෂතා සහ රහස් උපක්‍රම පාවිච්චි කරමින් සටන් වදින ආකාරය මේ කතාමාලාවෙන් බලාගන්න පුළුවන්.
මේ නිර්මාණය ගැන වයෝලා ඩේවිස් ගොඩක් සතුටින් ඉන්නේ. ඇය කියන විදිහට මේ වගේ වෙනස්ම සහ ගැඹුරු චරිතයක් ලැබීම ඇයට ලොකු සතුටක්. මේ කතාමාලාවේ රූගත කිරීම් 2027 වසරේදී ලොස් ඇන්ජලීස් නුවරදී ආරම්භ කිරීමට නියමිතයි. ජෝන් ලෝගන් සහ මයිකල් ඇගිලර් වැනි ප්‍රවීණයන් සමඟ එකතු වෙලා මේ නිර්මාණය කරන එක ඇත්තටම මැජික් එකක් වගේ වැඩක් කියලා තමයි වයෝලා සඳහන් කරන්නේ. ‘හව් ටු ගෙට් අවේ විත් මඩර්’ කතාමාලාවෙන් පස්සේ වයෝලා ඩේවිස් ප්‍රධාන චරිතයක් රඟපාන දෙවැනි ටෙලි කතාමාලාව විදිහට ‘ඇසෙන්ට්’ ඉතිහාසයට එක්වෙනවා. ඉතින් මේ අලුත්ම නිර්මාණය ගැන රසිකයන් ගොඩක් බලාපොරොත්තු තියාගෙන ඉන්නවා.
Discussion & Feedback