දශක ගණනාවකට පසුව ඇමරිකානු රජය විසින් සිරියාව ත්රස්තවාදී අනුග්රාහක රටවල් ලැයිස්තුවෙන් ඉවත් කිරීමට පියවර අරගෙන තියෙනවා. මේ තීරණයත් එක්ක සිරියාවට පනවා තිබුණු දැඩි ආර්ථික සම්බාධක ඉවත් වෙලා තියෙන අතර, ඒ වගේම හයාත් තහ්රීර් අල්-ෂාම් (HTS) සංවිධානය ගෝලීය ත්රස්තවාදී සංවිධාන ලැයිස්තුවෙන් ඉවත් කිරීමටත් ඇමරිකානු රාජ්ය දෙපාර්තමේන්තුව කටයුතු කරලා තියෙනවා. පසුගිය දෙසැම්බර් මාසයේදී බෂාර් අල්-අසාද්ගේ පාලනය පෙරළා දමමින් අහමඩ් අල්-ෂාරාගේ නායකත්වයෙන් නව පාලනයක් බලයට පත්වුණාට පස්සේ, සිරියාවේ දේශපාලනික සහ ආර්ථික ස්ථාවරත්වය ඇති කිරීමේ අරමුණින් මේ පියවර ගත් බව ඇමරිකානු භාණ්ඩාගාර ලේකම් ස්කොට් බෙසන්ට් ප්රකාශ කළා.
මේ තීරණය සිරියාවේ ආර්ථික පුනර්ජීවනයට ලොකු රුකුලක් වෙන බව ඇමරිකානු රාජ්ය ලේකම් මාකෝ රුබියෝ පවසනවා. මේ වන විටත් යුද්ධයෙන් විනාශ වුණු සිරියාවේ පෞද්ගලික අංශයේ ආයෝජන දිරිමත් කිරීමටත්, ගෝලීය ආර්ථිකය සමඟ නැවත සම්බන්ධ වීමටත් මේ තීරණය මගින් විශාල අවස්ථාවක් ලැබෙනවා. සිරියාවේ විදේශ ඇමති අසාද් අල්-ෂයිබානි මේක හඳුන්වලා තියෙන්නේ සිරියාවේ නව ගමනේ ඓතිහාසික සන්ධිස්ථානයක් විදියටයි. කෙසේ වෙතත්, ත්රස්තවාදයට එරෙහිව ඇමරිකාව ගෙන යන දැඩි ප්රතිපත්තියේ කිසිදු වෙනසක් වෙලා නැති බවත්, වැරදි කරන පාර්ශවයන්ට එරෙහිව දිගටම නීතිය ක්රියාත්මක කරන බවත් ඇමරිකානු බලධාරීන් අවධාරණය කරනවා.
Discussion & Feedback