පළමු ශ්රේණියට ළමුන් ඇතුළත් කිරීමේ අලුත් චක්රලේඛය නිසා විශ්වවිද්යාල ආචාර්යවරුන්ගේ දරුවන්ට විශාල අසාධාරණයක් සිදුවෙලා තියෙනවා කියලා විශ්වවිද්යාල ආචාර්යවරුන්ගේ සමිති සම්මේලනය පවසනවා. මේ සම්බන්ධයෙන් පසුගිය වසර එකහමාරක කාලයක් තිස්සේ බලධාරීන් එක්ක සාකච්ඡා කළත්, තවමත් කිසිම විසඳුමක් ලැබිලා නැහැ. ඒ නිසා තමන්ගේ දරුවන්ගේ අනාගතය වෙනුවෙන් වෘත්තීය ක්රියාමාර්ගයකට යන්න සිද්ධ වෙලා තියෙනවා කියලා එම සංගමයේ සභාපති මහාචාර්ය ප්රගීත් වීරතුංග මහතා සඳහන් කරනවා.
මේ ගැටලුවට විසඳුම් ලබාගන්න ආචාර්යවරුන් මේ වන විටත් තීරණ කිහිපයක් අරගෙන තියෙනවා. ඒ අනුව, පාසල් අධ්යාපනයට සම්බන්ධ සියලුම ස්වේච්ඡා වැඩසටහන්වලින්, ඒ කියන්නේ විෂය නිර්දේශ සංශෝධන, ගුරු පුහුණු වැඩසටහන් සහ සම්මන්ත්රණවලින් ඉවත් වෙන්න ඔවුන් තීරණය කරලා තියෙනවා. මේ සඳහා රජයට සති දෙකක කාලයක් ලබා දීලා තියෙනවා. ඒ කාලය ඇතුළත නිසි විසඳුමක් නොලැබුණොත්, ඉදිරියේදී පැවැත්වෙන උසස් පෙළ විභාගයේ පිළිතුරු පත්ර ඇගයීමේ කටයුතුවලින් ඉවත් වෙන්න සිදුවන බවත් ඔවුන් අවධාරණය කරනවා.
තමන්ගේ දරුවන්ට පාසල් අධ්යාපනය ලබාගැනීමේ අයිතිය පවා අහිමි වෙනවා නම්, තවදුරටත් රජය එක්ක සාකච්ඡා කරලා වැඩක් නැහැ කියලයි ආචාර්යවරුන් පෙන්වා දෙන්නේ. මේ තත්ත්වය මත ඉදිරියේදී උසස් පෙළ විභාගයේ ප්රතිඵල නිකුත් කිරීමේ ක්රියාවලියට විශාල බලපෑමක් එල්ල වෙන්න පුළුවන් බව පෙනෙන්නට තිබෙනවා.

Discussion & Feedback