අන්තර්ජාලය තුළ අතිශය ජනප්‍රියත්වයට පත් වුණු ට්‍රෙවර් හෙන්ඩර්සන්ගේ නිර්මාණ අතරින් තවත් භයානක චරිතයක් වන ‘කාටූන් කැට්’ (Cartoon Cat) චිත්‍රපටයක් ලෙසින් සිනමාවට ගෙන ඒමට සෝනි සමාගමට අයත් ට්‍රයිස්ටාර් පික්චර්ස් (TriStar Pictures) ආයතනය පියවර අරගෙන තියෙනවා. මීට සති කිහිපයකට කලින් හෙන්ඩර්සන්ගේම තවත් නිර්මාණයක් වන ‘සයිරන් හෙඩ්’ (Siren Head) චිත්‍රපටයක් ලෙසින් නිෂ්පාදනය කිරීමට වෝනර් බ්‍රදර්ස් ආයතනය කටයුතු කළා. ඒ වගේම මේ වන විට හොලිවුඩයේ බොහෝ චිත්‍රාගාර අන්තර්ජාලය හරහා ප්‍රසිද්ධ වුණු මෙවැනි නිර්මාණ කෙරෙහි දැඩි උනන්දුවක් දක්වන බව අපිට දකින්න පුළුවන්.
මේ ‘කාටූන් කැට්’ කියන්නේ පරණ කාටූන් චරිතවල මතකයන් සහ මිනිසුන්ගේ බිය උපයෝගී කරගෙන අපේ ලෝකයට පැමිණෙන ඉතාම භයානක සහ විනාශකාරී චරිතයක්. ට්‍රයිස්ටාර් පික්චර්ස් ආයතනය මේ චිත්‍රපටය ඉතා ඉක්මනින් නිෂ්පාදනය කිරීමට සැලසුම් කරමින් ඉන්නවා. හෙන්ඩර්සන් කියන්නේ දැනටමත් අන්තර්ජාලය තුළ බිලියන ගණනකගේ අවධානය දිනාගත් දක්ෂ නිර්මාණකරුවෙක්. ඉතින්, ඔහුගේ මේ අමුතු සහ භයානක චරිත සිනමා තිරය මත දකින්න ලැබීම සිනමා ලෝලීන්ට අලුත්ම අත්දැකීමක් වේවි. ඉදිරියේදී මේ චිත්‍රපටය අධ්‍යක්ෂණය කරන්නේ කවුද සහ රංගනයෙන් දායක වෙන්නේ කවුද කියන එක ගැන වැඩිදුර තොරතුරු බලාපොරොත්තු වෙන්න පුළුවන්.
Discussion & Feedback