ජනප්රිය සංචාරක ඇප් එකක් වන Hopper සමාගම මේ දිනවල ලොකු ප්රශ්නයක පැටලිලා ඉන්නවා. ඒ, තමන්ගේ පාරිභෝගිකයන්ව නොමඟ යවමින් සැඟවුණු ගාස්තු අය කිරීම සහ සේවාවන්වල සැබෑ මිල පැහැදිලි නොකිරීම නිසා ඇමරිකාවේ ෆෙඩරල් වෙළඳ කොමිසම (FTC) විසින් ගොනු කළ නඩුවක් හේතුවෙන්. මේ වෙනුවෙන් Hopper සමාගමට ඇමරිකානු ඩොලර් මිලියන 35ක වන්දියක් ගෙවන්න සිද්ධ වෙලා තියෙනවා. විශේෂයෙන්ම ඔවුන්ගේ ‘VIP Support’ සහ ‘Price Freeze’ වගේ සේවාවන්වලදී පාරිභෝගිකයන්ට නොදැනීම අමතර මුදල් අය කිරීම සහ තෝරාගත හැකි දේවල් අනිවාර්ය දේවල් විදිහට පෙන්වීම වගේ දේවල් නිසා තමයි මේ ගැටලුව මතු වෙලා තියෙන්නේ.
මේ වගේ දේවල් ‘Dark Patterns’ විදිහට තමයි හඳුන්වන්නේ. ඒ කියන්නේ පාරිභෝගිකයන්ව නොමඟ යවන විදිහට ඇප් එකේ නිර්මාණ සිදු කිරීම. උදාහරණයක් විදිහට, ඇප් එකේ පහළටම ස්ක්රෝල් කරලා බැලුවොත් විතරක් පේන විදිහට සමහර අමතර ගාස්තු ඇතුළත් කරලා තිබුණා. මේ සිද්ධිය සම්බන්ධයෙන් අදහස් දක්වපු Hopper සමාගම කියන්නේ, මේ චෝදනා පරණ ඒවා බවත්, දැනටමත් ඔවුන් ඒ ක්රමවේද වෙනස් කරලා තියෙන බවත්. කොහොම වුණත්, මේ ගෙවන මුදල පාරිභෝගිකයන්ට නැවත ලබා දීමට කටයුතු කරන අතර, අනාගතයේදී සියලුම ගාස්තු පැහැදිලිව පාරිභෝගිකයාට පෙනෙන විදිහට ප්රදර්ශනය කරන්න ඔවුන්ට සිද්ධ වෙනවා.
මේ සිද්ධියෙන් පස්සේවත් සංචාරක ඇප් භාවිතා කරන අය තමන්ගේ බුකින් එකක් කරනකොට ගාස්තු ගැන හොඳට හොයලා බලන එක වැදගත්. මොකද මේ වගේ දේවල් නිසා අපිට නොදැනීම අපේ මුදල් අමතර වියදම්වලට වැය වෙන්න පුළුවන්. Hopper වගේම තවත් බොහෝ සමාගම්වලට මේ වගේ නීතිමය ගැටලුවලට මුහුණ දෙන්න සිද්ධ වෙලා තියෙන නිසා, තාක්ෂණික සමාගම්වලට දැන් තමන්ගේ සේවා වඩාත් විනිවිදභාවයකින් යුතුව පවත්වාගෙන යන්න සිද්ධ වෙලා තියෙනවා.

Discussion & Feedback