1986 වසරේ තිරගත වුණු සුප්‍රසිද්ධ ‘ට්‍රාන්ස්ෆෝමර්ස්: ද මූවි’ (Transformers: The Movie) සජීවීකරණ චිත්‍රපටය නැවත වරක් ලොව පුරා සිනමාහල්වල තිරගත කිරීමට කටයුතු සූදානම් කරලා තියෙනවා. හැස්බ්‍රෝ (Hasbro) සහ ෆැතම් එන්ටර්ටේන්මන්ට් ආයතන එකතු වෙලා මේ වැඩේ කරන්නේ. මේ විශේෂිත 4K සංස්කරණය සැප්තැම්බර් 17 වැනිදා සිට සිනමාහල්වලදී රසවිඳින්න පුළුවන්. විශේෂයෙන්ම මේ චිත්‍රපටය නැවත තිරගත කිරීමේදී අලුත්ම පෝස්ට්-ක්‍රෙඩිට් දර්ශනයක් සහ කලින් නොදුටු විශේෂ කොටස් කිහිපයක් එකතු කරලා තියෙනවා කියලා තමයි ආරංචි වෙන්නේ. ටිකට්පත් අගෝස්තු 7 වැනිදා සිට මිලදී ගන්න පුළුවන්.
මේ චිත්‍රපටය හැස්බ්‍රෝ ආයතනය විසින් ක්‍රියාත්මක කරන ‘ඇපලොජි ටුවර්’ (Apology Tour) වැඩසටහනේ කොටසක් විදිහට තමයි නැවත එළිදක්වන්නේ. ඔප්ටිමස් ප්‍රයිම් චරිතයේ මරණය වෙනුවෙන් රසිකයන්ට කරන ගෞරවයක් විදිහට තමයි මේක සැලකෙන්නේ. ඔර්සන් වෙල්ස්, රොබට් ස්ටැක් සහ ලෙනාඩ් නිමෝයි වැනි දැවැන්ත නළු පිරිසකගේ හඬින් හැඩවුණු මේ චිත්‍රපටය ඇමරිකාවට අමතරව එක්සත් රාජධානිය, කැනඩාව, ඕස්ට්‍රේලියාව සහ ජර්මනිය වැනි රටවල් රැසක තිරගත වෙන්න නියමිතයි. ඒ වගේම මේ චිත්‍රපටයේ අලුත් සංගීත ඇල්බමයත් දැනටමත් ස්ට්‍රීමින් වේදිකාවල අහන්න පුළුවන්.
පසුගිය කාලේ ආපු ‘ට්‍රාන්ස්ෆෝමර්ස්: වන්’ (Transformers: One) චිත්‍රපටය ලෝකය පුරාම ලොකු සාර්ථකත්වයක් ලැබුවා. ඒ නිසාම මේ පැරණි සම්භාව්‍ය චිත්‍රපටය නැවත සිනමාහල්වලදී අත්විඳින්න ලැබීම ට්‍රාන්ස්ෆෝමර්ස් රසිකයන්ට නම් ඇත්තටම ලොකු සතුටක් වේවි. ඉතින් ඔයාලත් මේ චිත්‍රපටය බලන්න ආසාවෙන් ඉන්නවා නම් අනිවාර්යයෙන්ම මේ අවස්ථාව මගහැර ගන්න එපා.
Discussion & Feedback