ලෝක ප්රකට හොලිවුඩ් නළු ටොම් කෲස් මෑතකදී ලන්ඩන් නුවර පැවති BAFTA උත්සවයකදී කෘත්රිම බුද්ධිය (AI) සහ සිනමාව සම්බන්ධයෙන් කළ අදහස් දැක්වීමක් මේ වන විට ලොව පුරා කතාබහට ලක්වෙලා තියෙනවා. සිනමාව තුළ තාක්ෂණය කොතරම් දියුණු වුණත්, මිනිස් දෑතින් නිර්මාණය වන කලාවට කිසිවක් සමාන කළ නොහැකි බව ඔහු එහිදී අවධාරණය කළා. මිනිසුන් සැබෑ අත්දැකීම් සහ හැඟීම් දකින්න කැමති බවත්, සිනමා ශාලාවකට ගොස් චිත්රපටයක් නැරඹීම තුළින් ලැබෙන ඒ අද්විතීය අත්දැකීම කෘත්රිම බුද්ධියට ලබාදිය නොහැකි බවත් ඔහු ඉතා පැහැදිලිව පෙන්වා දුන්නා.
කෲස් තවදුරටත් සඳහන් කළේ සිනමා කර්මාන්තයේ නියැළී සිටින දක්ෂ ශිල්පීන්ගේ කැපවීම සහ ඔවුන්ගේ නිර්මාණශීලිත්වය ආරක්ෂා කර ගැනීම අත්යවශ්ය බවයි. ඔහු පවසන පරිදි, අපි යම් දෙයකට අවධානය යොමු කරන විට එයට ජීවයක් ලැබෙනවා. ඒ නිසාම තාක්ෂණයට වඩා මිනිසාගේ දායකත්වය සිනමාවට අත්යවශ්ය බව ඔහු නැවත නැවතත් සිහිපත් කළා. ඔහුගේ මේ අදහස් දැක්වීම එතැන සිටි පිරිසගේ දැඩි ප්රසාදයට ලක් වුණා.
මේ අතර, ටොම් කෲස් රංගනයෙන් දායක වන ඔහුගේ අලුත්ම චිත්රපටය වන ‘ඩිගර්’ (Digger) පිළිබඳවත් ඔහු එහිදී අදහස් බෙදා ගත්තා. තෙල් ව්යාපාරිකයෙකුගේ චරිතයකින් ඔහු දකින්න ලැබෙන මෙම චිත්රපටය ඉතාම සුවිශේෂී සහ සංවේදී නිර්මාණයක් බවයි ඔහු පවසන්නේ. ඔක්තෝබර් දෙවැනිදා තිරගත වීමට නියමිත මෙම චිත්රපටය පිළිබඳව ඔහුගේ රසිකයන් මේ වන විටත් ලොකු බලාපොරොත්තුවකින් පසුවනවා.
Discussion & Feedback