මෙක්සිකෝවේ සිනලෝවා ප්රාන්තයේ කුලියාකන් නගරය මේ දිනවල දැඩි අර්බුදයකට ලක්වෙලා තියෙනවා. ප්රසිද්ධ මත්ද්රව්ය ජාවාරම් කල්ලි දෙකක් අතර පවතින දරුණු ගැටුම් නිසා සාමාන්ය ජනතාවගේ ජීවිත සම්පූර්ණයෙන්ම අඩපණ වෙලා. පසුගිය ඉරිදා දහස් ගණන් ජනතාව සුදු ඇඳුමින් සැරසිලා වීදි බැස්සේ තමන්ගේ අතුරුදහන් වූ ආදරණීයයන්ගේ ඡායාරූප අතැතිවයි. ‘අපිට බය එපා, අපිට ඕන සාමය’ කියන සටන් පාඨය ඔවුන්ගේ ප්රධාන ඉල්ලීම වුණා. පසුගිය වසර දෙකක කාලය තුළ සිදුවූ මිනීමැරුම්, පැහැරගැනීම් සහ කොල්ලකෑම් නිසා මුළු නගරයම යුද පිටියක් බවට පත්වෙලා තියෙනවා.
මෙම ගැටුම ආරම්භ වුණේ ප්රධාන මත්ද්රව්ය ජාවාරම්කරුවෙකු වන ඉස්මයෙල් සම්බාඩා අත්අඩංගුවට ගැනීමත් සමඟයි. ඔහුගේ කල්ලිය සහ ‘එල් චාපෝ’ ගේ පුතුන්ගේ කල්ලිය අතර පවතින මේ බල අරගලය නිසා ව්යාපාරික ස්ථාන පන්දහසකට අධික ප්රමාණයක් වසා දමන්න සිදුවෙලා තියෙනවා. කතෝලික පල්ලියේ මැදිහත්වීමෙන් පැවැත්වූ විශේෂ දේව මෙහෙයකදී පවා බිෂොප්වරයා ඉල්ලා සිටියේ මිනිස් ජීවිතවලට වඩා කිසිම බලයක් හෝ මුදලක් වටින්නේ නැති බවයි. පසුගිය සතියේ වෙඩි හුවමාරුවකින් ජීවිතක්ෂයට පත්වුණු කුඩා දරුවාගේ පවුලේ අය පවා මේ විරෝධතාවට එක්වී සිටියා. දේශපාලන අස්ථාවරත්වයත් සමඟ එකතු වුණු මේ ප්රචණ්ඩත්වය නිසා සිනලෝවා වැසියන් අද අසරණ වෙලා ඉන්නවා.

Discussion & Feedback