මේ දවස්වල චීනයේ ගුවැන්ෂි පළාතට බලපාපු මයිසැක් සුළි කුණාටුව නිසා විශාල විනාශයක් වෙලා තියෙනවා. එක දිගට ඇද හැලුණු මහ වැස්සත් එක්ක ගංගා පිටාර ගලලා, වේලි පවා කැඩිලා ගිහින්. රෙන්හේ ගම්මානයේ පදිංචි ජනතාව කියන විදිහට, වතුර ගම ඇතුළට ආවේ හරිම වේගයෙන්. මිනිස්සුන්ට තමන්ගේ බඩු මුට්ටු ටිකවත් බේරගන්න වෙලාවක් තිබුණේ නැහැ. මේ වෙනකොට දහස් ගණනක් තමන්ගේ නිවෙස්වලින් අවතැන් වෙලා ඉන්න අතරේ, තවත් පිරිසක් ගෙවල්වල වහලවල් උඩට වෙලා උදව් බලාපොරොත්තුවෙන් ඉන්නවා. මේ ආපදාවෙන් අවම වශයෙන් 17 දෙනෙක්වත් ජීවිතක්ෂයට පත් වෙලා තියෙනවා කියලා තමයි වාර්තා වෙන්නේ.
මේ තත්ත්වය හරිම බරපතළයි. ගොඩක් ගම්මානවල විදුලිය සහ සන්නිවේදන පහසුකම් ඇනහිටලා නිසා පවුල්වල අය අතර සම්බන්ධතා පවා බිඳිලා. ඒ විතරක් නෙවෙයි, ගංවතුරත් එක්ක සත්තු ගොවිපළවල්වලින් පැනගිය විශාල සර්පයෝ පවා ජනාවාසවලට ඇවිත් ඉන්නවා කියලා මිනිස්සු බයෙන් කියනවා. ජනාධිපති ෂී ජින්පිං වහාම ක්රියාත්මක වෙලා මේ අයට සහන සලසන්න කියලා උපදෙස් දීලා තියෙනවා. හැබැයි ගලවාගැනීමේ කණ්ඩායම්වලටත් මේ අධික වැස්ස නිසා වැඩේ කරගන්න ලොකු අපහසුවක් වෙලා තියෙනවා. මේ අතරේ තවත් සුළි කුණාටුවක් චීනයේ නැගෙනහිර වෙරළ දෙසට එමින් පවතින බවට කාලගුණ විද්යාඥයන් අනතුරු අඟවනවා.

Discussion & Feedback