ඇමරිකානු රජය මේ දවස්වල අලුත්ම සැලැස්මක් ගැන කතා කරනවා. ඒ තමයි වාණිජමය වශයෙන් රොකට් දියත් කිරීම් සහ අභ්‍යවකාශ යානා ගොඩබෑම සඳහා මුහුදේ විශේෂ මධ්‍යස්ථාන හදන්න. ඇමරිකාවේ වෙරළ තීරයේ සිට සැතපුම් 200ක් දුරින් තියෙන ‘Outer Continental Shelf’ කියන ප්‍රදේශය මේ සඳහා යොදාගන්න තමයි ඔවුන් බලාපොරොත්තු වෙන්නේ. මේ වැඩේ හරහා අභ්‍යවකාශ කර්මාන්තය තවත් දියුණු කරන්නත්, රොකට් දියත් කිරීමේ හැකියාව වැඩි කරන්නත් පුළුවන් වෙයි කියලා ඇමරිකානු බලධාරීන් විශ්වාස කරනවා. මේ සඳහා දැනට තියෙන තෙල් සහ ගෑස් කැණීම් වේදිකා පවා යොදාගන්න ඔවුන් අදහස් කරලා තියෙනවා.
නමුත් මේ සැලැස්ම ගැන පරිසරවේදීන් නම් ඉන්නේ ලොකු කලකිරීමකින්. ඔවුන් කියන්නේ දැනටමත් රොකට් කැබලි සහ අභ්‍යවකාශ අපද්‍රව්‍ය නිසා වෙරළබඩ පරිසරයට ලොකු හානියක් වෙලා තියෙනවා කියලයි. මේ වගේ වැඩක් මුහුද මැද සිද්ධ වුණොත් තල්මසුන්, කැස්බෑවන් වගේ මුහුදු ජීවීන්ට විශාල තර්ජනයක් එල්ල වෙන්න පුළුවන්. මේක ඇත්තටම පරිසරය ආරක්ෂා කරනවා වෙනුවට ලොකු සමාගම්වල ලාභය වෙනුවෙන් මුහුද විනාශ කිරීමක් කියලා තමයි විවේචකයන් පෙන්වා දෙන්නේ. කොහොම වුණත්, මේ සම්බන්ධයෙන් අදහස් දැක්වීමට අගෝස්තු 7 වෙනිදා දක්වා කාලය ලබා දීලා තියෙනවා. ඉදිරියේදී මේ ගැන තවත් ලොකු කතාබහක් ඇති වෙයි කියලා අපිට බලාපොරොත්තු වෙන්න පුළුවන්.
Discussion & Feedback