ඇමරිකානු අභ්‍යවකාශ හමුදාව මේ වන විට අභ්‍යවකාශ යුද්ධයේ නව පිටුවක් පෙරළමින් සතුරාගේ චන්ද්‍රිකා අක්‍රීය කළ හැකි අති නවීන විද්‍යුත් චුම්භක අවියක් හඳුන්වා දී තිබෙනවා. ‘Meadowlands’ ලෙස නම් කර ඇති මෙම පද්ධතිය මගින් සතුරු චන්ද්‍රිකා භෞතිකව විනාශ නොකර, ඒවායේ සංඥා අවහිර කරමින් සන්නිවේදන කටයුතු සම්පූර්ණයෙන්ම අඩපණ කිරීමට හැකියාව පවතිනවා. මෙය රථයකින් පහසුවෙන් ප්‍රවාහනය කළ හැකි ඇන්ටනා පද්ධතියක් ලෙස නිර්මාණය කර ඇති අතර, ඕනෑම ස්ථානයක සිට සතුරු චන්ද්‍රිකා ඉලක්ක කර ගැනීමට මෙය යොදා ගන්නවා.
මෙම තාක්ෂණය පසුගිය කාලයේ ඉරානයට එරෙහිව පැවති මෙහෙයුම්වලදී ඉතා සාර්ථකව අත්හදා බැලූ බව අභ්‍යවකාශ හමුදාව පවසනවා. විශේෂයෙන්ම ‘Operation Midnight Hammer’ වැනි මෙහෙයුම්වලදී සතුරු සන්නිවේදන ජාලයන් අක්‍රීය කරමින් ඇමරිකානු හමුදාවන්ට විශාල වාසියක් ලබා දීමට මෙම පද්ධතිය සමත් වුණා. අභ්‍යවකාශ හමුදාවේ ප්‍රධානීන් පවසන පරිදි, නවීන යුද්ධයකදී අභ්‍යවකාශයේ ආධිපත්‍යය පවත්වා ගැනීම අත්‍යවශ්‍ය කරුණක් වන අතර, ඒ සඳහා මෙවැනි විද්‍යුත් යුධ උපකරණ අනාගතයේදී තීරණාත්මක කාර්යභාරයක් ඉටු කරනු ඇති.
2019 වසරේදී අභ්‍යවකාශ හමුදාව පිහිටුවූ දා සිටම මෙවැනි උසස් තාක්ෂණික අවි සහ පුහුණු වැඩසටහන් සඳහා විශාල මුදලක් ආයෝජනය කර තිබෙනවා. චන්ද්‍රිකා තාක්ෂණය මත පදනම් වූ ඔත්තු බැලීම් සහ සන්නිවේදන පද්ධති අද වන විට යුධ පිටියේ හදවත බඳුයි. එබැවින් සතුරාගේ අභ්‍යවකාශ හැකියාවන් අඩපණ කිරීමේ හැකියාව ඕනෑම රටක හමුදාවකට විශාල ශක්තියක් වන බවයි විශේෂඥයන් පෙන්වා දෙන්නේ.
Discussion & Feedback