ලොව පුරාම ගේම් ලෝලීන්ගේ ආදරය දිනාගත් ‘ද ලෙජන්ඩ් ඔෆ් සෙල්ඩා’ (The Legend of Zelda) වීඩියෝ ගේම් එක ඇසුරින් නිර්මාණය වන සිනමා පටය ගැන මේ දිනවල ලොකු කතාබහක් ඇතිවෙලා තියෙනවා. 2027 අප්‍රේල් මාසයේදී තිරගත වීමට නියමිත මේ දැවැන්ත නිර්මාණයේ ප්‍රධාන චරිතය වන ‘ලින්ක්’ ලෙස රඟපාන බෙන්ජමින් එවන් අයින්ස්වර්ත්, මෑතකදී ලබාදුන් සම්මුඛ සාකච්ඡාවකදී මේ ගැන අලුත්ම තොරතුරු ටිකක් බෙදාගෙන තිබුණා. ඔහු කියන විදිහට මේ චිත්‍රපටයේ ඇඳුම් පැළඳුම් සහ නිෂ්පාදන කටයුතු ඉතාමත් ඉහළ මට්ටමක තියෙනවා. විශේෂයෙන්ම හයිරූල් (Hyrule) ලෝකය මැවීමට යොදාගෙන තියෙන තාක්ෂණය සහ කලාත්මක බව ගැන ඔහු ලොකු පැහැදීමකින් ඉන්නේ.
වෙස් බෝල්ගේ අධ්‍යක්ෂණයෙන් හැඩවෙන මේ චිත්‍රපටයේ සෙල්ඩා කුමරිය ලෙස බෝ බ්‍රැගසන් රඟපානවා. චිත්‍රපටයේ රූගත කිරීම් නිව්සීලන්තයේ ඔටාගෝ ප්‍රදේශයේ සිදු කර ඇති අතර, එය ‘ලෝඩ් ඔෆ් ද රින්ග්ස්’ චිත්‍රපට මාලාව රූගත කළ සුන්දර පරිසරය සිහිගන්වනවා. දැනට චිත්‍රපටයේ ට්‍රේලරයක් නිකුත් වෙලා නැති වුණත්, සෙට් එකෙන් ලැබුණු ඡායාරූපවලින් ඉම්පා වැනි චරිත ගැන ඉඟි ලැබෙනවා. ගැනන්ඩෝෆ් වැනි ප්‍රධාන විරුද්ධවාදී චරිත ගැන තවමත් නිල තහවුරු කිරීමක් නැතත්, රසිකයන් මේ චිත්‍රපටය එනතුරු ඉන්නේ ලොකු බලාපොරොත්තුවකින්. කොහොම වුණත්, 2027 අප්‍රේල් 30 වෙනිදා මේ සිනමා අත්දැකීම සිනමාහල්වලදී අපිට බලාගන්න පුළුවන් වෙයි.
Discussion & Feedback