පසුගියදා පැවැත්වුණු එමී සම්මාන උළෙලේදී ස්ටීවන් කෝල්බට්ගේ ‘ද ලේට් ෂෝ’ වැඩසටහන කාගේත් අවධානය දිනාගනිමින් පුදුමාකාර ජයග්‍රහණ කිහිපයක්ම අත්කර ගත්තා. විශේෂයෙන්ම වසර දහයක් පුරාවටම ජෝන් ඔලිවර්ගේ වැඩසටහනට හිමිවූ ‘Outstanding Writing For A Variety Series’ සම්මානය මෙවර කෝල්බට්ගේ වැඩසටහන විසින් දිනාගැනීම බොහෝ දෙනෙක් බලාපොරොත්තු නොවූ දෙයක්. ඒ වගේම ඔවුන්ගේ ‘Colbert Before Air’ ඩිජිටල් වැඩසටහනත් සම්මානයට පාත්‍ර වුණා. මේ ජයග්‍රහණත් එක්ක සැප්තැම්බර් 14 වෙනිදා පැවැත්වෙන ප්‍රධාන එමී සම්මාන උළෙලේදීත් කෝල්බට්ගේ වැඩසටහනට ලොකු බලාපොරොත්තුවක් තියාගන්න පුළුවන්.
අනිත් පැත්තෙන් ‘ද ඩේලි ෂෝ’ වැඩසටහනත් හිස් අතින් ආවේ නැහැ. එහි දක්ෂ නිවේදිකා ඩෙසි ලිඩික් ‘Outstanding Performer in a Short Form Comedy or Drama Series’ සම්මානය පිට පිටම දෙවෙනි වතාවටත් දිනාගන්න සමත් වුණා. ඇය වේදිකාවේදී විහිළුවට වගේ කිව්වේ තමන් දිගින් දිගටම සම්මාන දිනුවොත් ධවල මන්දිරයෙන් තමන්ව මාධ්‍ය ලේකම්වරිය විදිහට පත් කරයි කියලා බයයි කියලයි. ඒ වගේම තමන්ගේ පියා ෆොක්ස් නිවුස් නාලිකාව නැරඹීම නතර කරන බවට පොරොන්දු වුණු කතාවත් ඇය විනෝදජනක විදිහට වේදිකාවේදී සිහිපත් කළා. කොහොම වුණත් මේ ජයග්‍රහණ එක්ක ඇමරිකානු රූපවාහිනී ක්ෂේත්‍රයේ ලේට්-නයිට් වැඩසටහන් අතර ලොකු තරඟයක් නිර්මාණය වෙලා තියෙනවා.
Discussion & Feedback