2013 වසරේදී PlayStation 3 හරහා ලෝකයට හඳුන්වා දුන් ‘The Last of Us’ ක්‍රීඩාව අද වන විට ලෝකයම දන්නා දැවැන්ත නිර්මාණයක් බවට පත්වෙලා තියෙනවා. මේ කතාවේ එන ජොයෙල් සහ එලීගේ සංවේදී ගමන වගේම, වෛරසයකින් විනාශ වුණු ලෝකයක ඔවුන් කරන අරගලය ලක්ෂ සංඛ්‍යාත රසිකයන්ගේ ආකර්ෂණය දිනාගත්තා. කෙසේ වෙතත්, මේ කතා මාලාවේ තුන්වන කොටසක් එනවාද නැද්ද කියන එක ගැන තවමත් නිශ්චිත තොරතුරක් ලැබිලා නැහැ. Naughty Dog ආයතනය දැනට ඔවුන්ගේ අලුත්ම ව්‍යාපෘතිය වන ‘Intergalactic: The Heretic Prophet’ වෙනුවෙන් වැඩි අවධානයක් යොමු කරලා තියෙන නිසා, තුන්වන කොටස ගැන තවමත් නිල ප්‍රකාශයක් කරලා නැහැ.
නමුත් මේ කතාවේ නිර්මාතෘ නීල් ඩ්‍රක්මන් මෑතකදී සමාජ මාධ්‍ය ඔස්සේ පළ කරපු සටහනක් නිසා රසිකයන් අතර ලොකු කතාබහක් ඇති වෙලා තියෙනවා. ඔහු තමන්ගේ පැරණි සටහන් කිහිපයක් බෙදාගනිමින්, ‘ඉදිරියට තව ගමන් කිහිපයක් ඉතිරිව තියෙනවා’ කියලා සඳහන් කරලා තිබුණා. මේ වචන ටිකෙන් ඔහු අදහස් කළේ ‘The Last of Us Part 3’ ගැනද කියන එක තමයි දැන් හැමෝම ප්‍රශ්න කරන්නේ. කලින් ඔහු මේ කතා මාලාව මෙතැනින් අවසන් වෙන්න පුළුවන් කියලා කිව්වත්, පසුව තවත් පරිච්ඡේදයක් ඉතිරිව තියෙන බවට ඉඟි පළ කරලා තිබුණා.
කොහොම වුණත්, ඩ්‍රක්මන්ගේ මේ රහසිගත ඉඟිය නිසා රසිකයන් ඉන්නේ ලොකු බලාපොරොත්තුවකින්. Naughty Dog ආයතනය දැනට වෙනත් වැඩකටයුතු වල නිරත වුණත්, කවදා හෝ දවසක මේ අපූරු කතාවේ අවසාන පරිච්ඡේදය අපිට දකින්න ලැබෙයි කියලා තමයි හැමෝම විශ්වාස කරන්නේ. ඉතින්, මේ ගැන තවත් නිල තොරතුරක් ලැබෙනකම් අපිට ඉවසීමෙන් බලා ඉන්න සිද්ධ වෙනවා.
Discussion & Feedback