හොලිවුඩ් සිනමාවේ දැවැන්තයෙක් වන බ්‍රැඩ් පිට්, තමන්ගේ ඔස්කාර් සම්මාන දිනූ අමතක නොවන ‘ක්ලිෆ් බූත්’ චරිතය සමඟින් නැවතත් ප්‍රේක්ෂකයන් අතරට එන්න සූදානම් වෙනවා. ක්වෙන්ටින් ටැරන්ටිනෝගේ ‘වන්ස් අපන් අ ටයිම් ඉන් හොලිවුඩ්’ චිත්‍රපටයේ එන මේ ජනප්‍රිය චරිතය කේන්ද්‍ර කරගෙන නිර්මාණය වන ‘ද ෆර්දර් මිස්-ඇඩ්වෙන්චර්ස් ඔෆ් ක්ලිෆ් බූත්’ චිත්‍රපටය අධ්‍යක්ෂණය කරන්නේ ප්‍රවීණ අධ්‍යක්ෂ ඩේවිඩ් ෆින්චර් විසින්. 1977 වසරේ හොලිවුඩය පසුබිම් කරගෙන නිර්මාණය වන මේ චිත්‍රපටය හරහා ක්ලිෆ් බූත්ගේ ජීවිතයේ තවත් අලුත් පැතිකඩක් අපිට බලාගන්න පුළුවන්.
මෙම චිත්‍රපටයේ තිර රචනය ටැරන්ටිනෝ විසින් සිදු කර තිබීම විශේෂත්වයක්. බ්‍රැඩ් පිට්ට අමතරව එලිසබෙත් ඩෙබිකි, ස්කොට් කාන් සහ කාර්ලා ගුගිනෝ වැනි දක්ෂ නළු නිළියන් රැසක් මෙහි රංගනයෙන් දායක වෙනවා. නොවැම්බර් 25 වැනිදා සිට සති දෙකක කාලයක් IMAX සිනමාහල්වල ප්‍රදර්ශනය කෙරෙන මෙම චිත්‍රපටය, ඉන් අනතුරුව දෙසැම්බර් 23 වැනිදා සිට නෙට්ෆ්ලික්ස් ඔස්සේ ලොව පුරා ප්‍රේක්ෂකයන්ට නැරඹීමට අවස්ථාව ලැබෙනවා. ටැරන්ටිනෝගේ ආශිර්වාදය ඇතිව ඩේවිඩ් ෆින්චර් විසින් අධ්‍යක්ෂණය කරන මේ සිනමා කෘතිය ගැන මේ වන විටත් ලොව පුරා සිනමා ලෝලීන් අතර ලොකු කතාබහක් ඇති වෙලා තියෙනවා.
Discussion & Feedback