ලෝක ප්‍රකට බීට්ල්ස් (The Beatles) සංගීත කණ්ඩායම සහ යුනිවර්සල් මියුසික් සමූහය අතර අලුත්ම හවුල්කාරිත්වයක් ඇති කරගෙන තියෙනවා. මේ ගිවිසුම හරහා බීට්ල්ස් කණ්ඩායමේ සියලුම භාණ්ඩ අලෙවිය, බලපත්‍ර ලබාදීම සහ අන්තර්ජාලය හරහා සිදුවන වෙළඳ කටයුතු සියල්ල යුනිවර්සල් මියුසික් ආයතනය විසින් පාලනය කරනවා. දැනටමත් ඔවුන් බීට්ල්ස් සංගීත නිර්මාණ කළමනාකරණය කරන අතර, මේ නව පියවරත් එක්ක රසිකයන්ට ඔවුන්ගේ ප්‍රියතම සංගීත කණ්ඩායම ගැන තවත් බොහෝ දේ අලුතින් අත්විඳින්න ලැබෙනු ඇති.
මේ අතර, 2027 වසරේදී ලන්ඩනයේදී ‘The Beatles at 3 Savile Row’ නමින් දැවැන්ත ප්‍රදර්ශනයක් පැවැත්වීමට නියමිතයි. මෙහිදී බීට්ල්ස් කණ්ඩායමේ මෙතෙක් දැක නොතිබූ දුර්ලභ දේවල් සහ ඔවුන්ගේ පටිගත කිරීමේ මැදිරිය පවා නැවත නිර්මාණය කරලා තියෙනවා. ඒ වගේම, 2028 වසරේදී සැම් මෙන්ඩස්ගේ අධ්‍යක්ෂණයෙන් බීට්ල්ස් කණ්ඩායමේ ජීවිත කතාව ඇතුළත් චිත්‍රපට හතරක් එළිදැක්වීමට නියමිතයි. මේ චිත්‍රපට සඳහා පෝල් මෙස්කල්, ජෝසප් ක්වින්, බැරී කියෝගන් සහ හැරිස් ඩිකින්සන් වැනි ජනප්‍රිය නළු නිළියන් රැසක් රංගනයෙන් දායක වෙනවා. දැනටමත් ඔවුන් ඇබේ රෝඩ් ඇල්බමයේ කවරය නැවත නිර්මාණය කරන දර්ශන සමාජ මාධ්‍යවල ලොකු කතාබහක් ඇති කරලා තියෙනවා. බීට්ල්ස් රසිකයන්ට ඉදිරි වසර කිහිපය ඇත්තටම සුවිශේෂී කාලයක් වේවි.
Discussion & Feedback