ටෙස්ලා සමාගම විසින් චීනයේ අලෙවි කර ඇති රථ මිලියන තුනකට ආසන්න ප්රමාණයක් නැවත කැඳවීමට පියවර ගෙන තිබෙනවා. මෙයට ප්රධාන හේතුව වී ඇත්තේ අනතුරක් හෝ ගින්නක් වැනි හදිසි අවස්ථාවකදී රථයේ දොරවල් විවෘත කර ගැනීමට ඇති අපහසුතාවයයි. නවීන විද්යුත් රථවල දොරවල් විවෘත කිරීම සඳහා ඉලෙක්ට්රොනික පද්ධති භාවිතා කරන අතර, හදිසි අවස්ථාවකදී භාවිතා කළ යුතු අතින් ක්රියාත්මක වන දොර හැන්ඩ්ල් බොහෝ විට රියදුරන්ට හෝ මගීන්ට සොයා ගැනීමට අපහසු ස්ථානවල සැඟවී තිබීම විශාල ගැටලුවක් වී තිබෙනවා. මෙම තත්ත්වය නිසා මගීන් රථය තුළ සිරවීමේ අවදානමක් පවතින බවයි වාර්තා වන්නේ.
ටෙස්ලා සමාගම පමණක් නොව චීනයේ ක්රියාත්මක වන තවත් මෝටර් රථ නිෂ්පාදකයන් 10ක් ද මෙම ගැටලුවට විසඳුම් ලෙස තම රථ සඳහා විශේෂ අනතුරු ඇඟවීමේ ලේබල් ඇලවීමට සහ මෘදුකාංග යාවත්කාලීන කිරීමට කටයුතු කරමින් සිටිනවා. මීට අමතරව, 2027 වසරේ සිට චීනය තුළ සැඟවුණු ඉලෙක්ට්රොනික දොර හැන්ඩ්ල් භාවිතය තහනම් කිරීමට ද බලධාරීන් තීරණය කර තිබෙනවා. ඇමරිකාව ඇතුළු රටවල් කිහිපයකම ආරක්ෂක අංශ මේ පිළිබඳව දැඩි අවධානයක් යොමු කර ඇති අතර, අනාගතයේදී නිෂ්පාදනය කරන රථවල හදිසි දොර විවෘත කිරීමේ පද්ධති වඩාත් පහසුවෙන් භාවිතා කළ හැකි ආකාරයට සකස් කිරීමට සමාගම්වලට සිදුවනු ඇති.
ටෙස්ලා සමාගම පවසන්නේ තමන් ඉදිරියේදී නිෂ්පාදනය කරන රථවල දොර හැන්ඩ්ල් සැලසුම් කිරීමේදී මෙම ආරක්ෂක ගැටලු මඟහරවා ගැනීමට අවශ්ය වෙනස්කම් සිදු කරන බවයි. කෙසේ වෙතත්, මෙම සිදුවීමත් සමඟ ඉලෙක්ට්රොනික දොර පද්ධතිවල ආරක්ෂාව පිළිබඳව ලොව පුරා විශාල කතාබහක් ඇති වී තිබෙනවා.
Discussion & Feedback