ජර්මනියේ ඉහළ බැවේරියාවේ පිහිටි පාසලක සිදුවූ බිහිසුණු ප්රහාරයකින් වයස අවුරුදු 13ක දැරියන් දෙදෙනෙකු බරපතල ලෙස තුවාල ලබා තිබෙනවා. ෂොන්ගාවු නගරයේ පිහිටි මෙම පාසලට කඩා වැදුණු 16 හැවිරිදි සැකකරුවෙකු විසින් මෙම ප්රහාරය එල්ල කර ඇති අතර, ඔහු සතුව පිහියක් සහ ගිනි අවියක් තිබූ බව පොලිසිය තහවුරු කරනවා. වාසනාවකට මෙන්, තුවාල ලැබූ දැරියන් දෙදෙනාගේ තත්ත්වය ජීවිතයට තර්ජනයක් නොවන බවයි බලධාරීන් පවසන්නේ.
මෙම සිදුවීම සම්බන්ධයෙන් අත්අඩංගුවට ගත් 16 හැවිරිදි සැකකරු මීට පෙර මානසික ප්රතිකාර ලබාගෙන ඇති අයෙකු බව බැවේරියාවේ අභ්යන්තර කටයුතු අමාත්යවරයා සඳහන් කරනවා. ඔහු එම පාසලේම හිටපු සිසුවෙකු විය හැකි බවට සැකයක් පවතින නමුත්, ඒ සම්බන්ධයෙන් තවමත් නිල තහවුරු කිරීමක් සිදුවී නැහැ. පොලිසිය මේ වන විටත් සිද්ධිය සම්බන්ධයෙන් පුළුල් පරීක්ෂණයක් ආරම්භ කර ඇති අතර, පාසල් සිසුන්ගේ දෙමාපියන් සහ ඥාතීන් වෙනුවෙන් විශේෂ තොරතුරු මධ්යස්ථානයක් ද ගිනි නිවන ස්ථානයක පිහිටුවා තිබෙනවා.
ප්රහාරය සිදුවූ අවස්ථාවේ පාසල තුළ විශාල කලබලකාරී තත්ත්වයක් ඇතිවී තිබුණා. සැකකරු තනිවම මෙම ප්රහාරය සැලසුම් කර ක්රියාත්මක කළ බවටයි පොලිසිය විශ්වාස කරන්නේ. කෙසේ වෙතත්, ප්රහාරයට හේතුව හෝ සැකකරුගේ පසුබිම පිළිබඳව තවමත් පැහැදිලි තොරතුරු අනාවරණය වී නැහැ. සිද්ධිය සම්බන්ධයෙන් වැඩිදුර විමර්ශන කටයුතු මේ වන විටත් ක්රියාත්මකයි.

Discussion & Feedback