ජර්මනියේ දකුණුදිග බවාරියා ප්රාන්තයේ පිහිටි පාසලක සිදුවූ බිහිසුණු ප්රහාරයකින් වයස අවුරුදු 13ක දැරියන් දෙදෙනෙකු බරපතළ ලෙස තුවාල ලබා තිබෙනවා. ෂොන්ගාවු නගරයේ පිහිටි මෙම පාසලට කඩා වැදුණු 16 හැවිරිදි තරුණයෙකු විසින් මෙම ප්රහාරය එල්ල කර ඇති අතර, සැකකරු සතුව පිහියක් සහ ගිනි අවියක් තිබී ඇති බවයි පොලිසිය පවසන්නේ. වාසනාවකට මෙන්, තුවාල ලැබූ දැරියන් දෙදෙනාගේ ජීවිතවලට තවමත් තර්ජනයක් නොමැති බව බලධාරීන් තහවුරු කර තිබෙනවා.
මෙම සිදුවීම සම්බන්ධයෙන් අත්අඩංගුවට ගත් සැකකරු මීට පෙර මානසික ප්රතිකාර ලබාගෙන ඇති අයෙකු බව බවාරියා ප්රාන්තයේ අභ්යන්තර කටයුතු අමාත්යවරයා සඳහන් කරනවා. ඔහු එම පාසලේම හිටපු සිසුවෙකු විය හැකි බවටද තොරතුරු වාර්තා වනවා. ප්රහාරය සිදුවූ වහාම ප්රදේශයේ විශාල පොලිස් මෙහෙයුමක් දියත් කෙරුණු අතර, සිසුන්ගේ දෙමාපියන් සහ ඥාතීන් සඳහා ගිනි නිවන ස්ථානයක විශේෂ තොරතුරු මධ්යස්ථානයක්ද පිහිටුවා තිබෙනවා. සැකකරු තනිවම මෙම ප්රහාරය සැලසුම් කර ක්රියාත්මක කළ බවටයි පොලිසිය සැක පළ කරන්නේ.
ප්රහාරයට හේතුව මෙතෙක් පැහැදිලි නැති අතර, සිද්ධිය සම්බන්ධයෙන් වැඩිදුර විමර්ශන කටයුතු තවමත් ක්රියාත්මකයි. 1887 වසරේදී ආරම්භ කළ මෙම පාසල වසර ගණනාවක් තිස්සේ ජර්මනියේ ප්රසිද්ධ අධ්යාපන ආයතනයක් ලෙස පවතිනවා. මෙවැනි සිදුවීමක් පාසල් පරිශ්රයක සිදුවීම ජර්මනිය පුරාම දැඩි කම්පනයක් ඇති කිරීමට හේතු වී තිබෙනවා.

Discussion & Feedback