පෝලන්තය සහ යුක්රේනය අතර පවතින සබඳතා බිඳ දැමීමේ අරමුණින් රුසියානු බුද්ධි අංශවල සහාය ඇතිව කඩාකප්පල්කාරී ක්රියාවල නිරත වූ 18 හැවිරිදි යුක්රේන ජාතිකයෙකු සම්බන්ධයෙන් මේ වන විට ලොකු කතාබහක් ඇති වෙලා තියෙනවා. ඉලියා කේ. ලෙස හඳුනාගෙන ඇති මෙම තරුණයා, පසුගිය වසරේ නොවැම්බර් මාසයේ සිට අගෝස්තු දක්වා කාලය තුළ අපරාධ ක්රියා 47කට සම්බන්ධ බවටයි පෝලන්ත බලධාරීන් චෝදනා කරන්නේ. විශේෂයෙන්ම දෙවන ලෝක යුද්ධ සමයේ සිදුවූ වොලිනියා සමූලඝාතනයට සම්බන්ධ ස්මාරක විනාශ කිරීම සහ යුක්රේන කැරලිකාර හමුදාව (UPA) උත්කර්ෂයට නංවන සලකුණු තැබීම වැනි ක්රියාවන් හරහා දෙරටේ ජනතාව අතර වාර්ගික ගැටුම් ඇති කිරීමට ඔහු උත්සාහ කර තිබෙනවා.
පෝලන්ත අභ්යන්තර ආරක්ෂක ඒජන්සිය පවසන විදිහට, මෙම තරුණයා මුදල් ඉපයීමේ අරමුණින් රුසියාව සහ චීනය හරහා ක්රියාත්මක වූ ගුප්ත කේත මුදල් (cryptocurrency) භාවිත කරමින් මෙම අපරාධ සිදු කර තියෙනවා. ඔහු පෝලන්ත ජනාධිපතිවරයාගේ රථ පෙළ ඉලක්ක කර ගනිමින් ඩ්රෝන යානයක් යැවීමට පවා සැලසුම් කර තිබියදීයි අත්අඩංගුවට පත් වුණේ. රුසියානු බුද්ධි අංශවලින් ලැබෙන උපදෙස් මත පණිවිඩ හුවමාරු සේවා හරහා ඔහු මෙම කාර්යයන් ඉටු කර ඇති අතර, ඒ සඳහා සාක්ෂි ලෙස ඡායාරූප පවා යවා තිබෙනවා. වරදකරු වුවහොත් ඔහුට ජීවිතාන්තය දක්වා සිරදඬුවම් ලැබිය හැකි බවයි වාර්තා වෙන්නේ. දෙරටේ ඉතිහාසය සහ මතවාදී ගැටුම් මෙලෙස බුද්ධි අංශ විසින් අවියක් කර ගැනීම ජාත්යන්තරව විශාල අවධානයක් දිනාගෙන තියෙනවා.

Discussion & Feedback