ඇලස්කාවේ බෙරිං මුහුදේදී පෙරළී ගිය බෝට්ටුවක් මත දින ගණනාවක් තිස්සේ අසරණව සිටි 15 හැවිරිදි ඩෙරෙක් පාකර් අග්නාන්ගා නම් පිරිමි ළමයෙක්ව බේරා ගැනීමට හැකි වුණා. පසුගිය සැප්තැම්බර් 4 වැනිදා තම වැඩිමහල් සොහොයුරා සහ නෑදෑ සොහොයුරා සමඟ මසුන් ඇල්ලීමට ගිය මොහු, බෝට්ටුව පෙරළී යාමෙන් පසු මුහුදේ තනි වුණා. අවාසනාවන්ත ලෙස ඔහුගේ සොහොයුරා සහ නෑදෑයා මෙම අනතුරින් ජීවිතක්ෂයට පත් වුණා. ඇමරිකානු වෙරළාරක්ෂක බලකාය සහ ප්රදේශයේ ධීවර යාත්රාවක් එක්ව සිදුකළ මෙහෙයුමකින් පසු, සඳුදා උදෑසන මෙම දරුවා බේරා ගැනීමට ඔවුන්ට හැකි වුණා.
බේරා ගන්නා විටත් දැඩි ශීතලෙන් (hypothermia) පීඩා විඳිමින් සිටි මෙම දරුවා, කිසිදු ආහාරයක් හෝ ජලය නොමැතිව දින දෙකක් මුහුද මැද බෝට්ටුව උඩ රැඳී සිට තිබෙනවා. ඔහු ඉතාමත් ධෛර්යවන්ත දරුවෙක් බව ඔහුව බේරාගත් ධීවර යාත්රාවේ නියමුවා පවා පවසා තිබුණා. තම පවුලේ අයට සහ ප්රජාවට ආහාර සපයන්නට ගිය මෙම දරුවන් තිදෙනාගේ කතාව ඇත්තටම හද කම්පා කරවන සුළුයි. මේ වන විට ඩෙරෙක් තම නිවසේ සුවය ලබමින් සිටින අතර, ඔහු මුහුදේ සිටි කාලය පුරාම යාඥා කරමින් ඉතාමත් ධෛර්යවන්තව සිටි බව ඔහුගේ මව සමාජ මාධ්ය ඔස්සේ පවසා තිබුණා. දරුවාගේ මෙම ජීවිතය බේරාගැනීමේ පුවත මේ වන විට ලොව පුරා බොහෝ දෙනාගේ අවධානයට ලක්ව තිබෙනවා.

Discussion & Feedback