මේ වසරේ පැවැත්වෙන 2026 Critics Choice Super Awards සම්මාන උළෙලේ නිර්දේශිත නාමයන් මේ වන විට ප්‍රකාශයට පත් කරලා තියෙනවා. ඒ අනුව, Warner Bros සහ DC ආයතනය නිෂ්පාදනය කළ ‘සුපර්මෑන්’ චිත්‍රපටය නිර්දේශ හයක් දිනා ගනිමින් පෙරමුණ ගැනීමට සමත් වෙලා තියෙනවා. හොඳම සුපිරි වීර චිත්‍රපටය (Best Superhero Movie) ඇතුළු ප්‍රධාන කාණ්ඩ කිහිපයක් සඳහාම මෙය නිර්දේශ වී තිබීම විශේෂත්වයක්. විශේෂයෙන්ම එහි රඟපාන ඩේවිඩ් කොරන්ස්වෙට්, එඩි ගාතෙගි සහ නිකලස් හොල්ට් යන නළුවන් තිදෙනාම හොඳම නළුවා සඳහා නිර්දේශ වී සිටීම චිත්‍රපටයේ ජනප්‍රියත්වය කියාපානවා.
ටෙලිවිෂන් අංශයෙන් ගත්තොත්, ප්‍රයිම් වීඩියෝ හි ජනප්‍රිය කතාමාලාවක් වන ‘ද බෝයිස්’ (The Boys) නිර්දේශ පහක් දිනාගෙන පෙරමුණේ ඉන්නවා. හොඳම සුපිරි වීර කතාමාලාව සහ ඇන්ටනි ස්ටාර් සඳහා හොඳම නළුවා ලෙස නිර්දේශ ලැබීම මෙහි කැපී පෙනෙන කරුණක්. මීට අමතරව ‘Masters of the Universe’, ‘Fallout’ සහ ‘House of the Dragon’ වැනි ජනප්‍රිය නිර්මාණ රැසක් ද නිර්දේශ අතර තිබෙනවා.
මෙම සම්මාන උළෙල මගින් සිනමා සහ රූපවාහිනී ක්ෂේත්‍රයේ සුපිරි වීර, විද්‍යා ප්‍රබන්ධ, ෆැන්ටසි සහ ක්‍රියාදාම වැනි ප්‍රේක්ෂක ආකර්ෂණය දිනාගත් නිර්මාණ ඇගයීමට ලක් කරනවා. මෙවර සම්මාන උළෙලක් පැවැත්වෙන්නේ නැති වුණත්, ජයග්‍රාහකයන් කවුද කියලා අගෝස්තු 6 වැනිදා නිල වශයෙන් ප්‍රකාශයට පත් කිරීමට නියමිතයි. සිනමා ලෝලීන් මේ වන විටත් තමන්ගේ ප්‍රියතම නිර්මාණ ජයග්‍රහණය කරනු ඇතැයි දැඩි බලාපොරොත්තුවෙන් පසුවනවා.
Discussion & Feedback