ලෝක ප්‍රසිද්ධ ලේඛක ස්ටීවන් කිංගේ පොත් ඇමරිකාවේ රතු ප්‍රාන්තයක් වන යූටා ප්‍රාන්තයේ පාසල්වලින් තහනම් කිරීමට ගත් තීරණය මේ දිනවල ලොකු කතාබහකට ලක්වෙලා තියෙනවා. විශේෂයෙන්ම ඔහුගේ ‘ඩිෆරන්ට් සීසන්ස්’ (Different Seasons) කෘතිය මේ විදිහට තහනම් කරලා තියෙන්නේ එහි අසභ්‍ය දේවල් අඩංගු බව පවසමින්. නමුත් මේ ගැන සමාජ මාධ්‍ය ඔස්සේ අදහස් දක්වමින් ස්ටීවන් කිං ප්‍රශ්න කරන්නේ, මිත්‍රත්වය සහ ධෛර්යය ගැන කතා කරන, තරුණ පරපුරට කියවන්න පුළුවන් කතා ඇයි මෙහෙම තහනම් කරන්නේ කියලා. ඇත්තටම මේ පොතේ තියෙන ‘ද ෂෝෂෑන්ක් රෙඩෙම්ප්ෂන්’ සහ ‘ස්ටෑන්ඩ් බයි මී’ වගේ කතා ලෝකයේම ආදරය දිනාගත්ත නිර්මාණ බව අමුතුවෙන් කියන්න ඕනේ නැහැනේ.
ඇමරිකාවේ වැඩිපුරම තහනමට ලක්වෙන ලේඛකයා විදිහට සැලකෙන්නේත් ස්ටීවන් කිං. ඔහු මීට කලිනුත් තමන්ගේ පොත් තහනම් කරන එක වැරදි බවත්, පාඨකයන්ට තමන් කැමති පොතක් තෝරා ගැනීමේ අයිතිය තියෙන බවත් නිතරම පවසනවා. දේශපාලන කාරණා සම්බන්ධයෙන් වුණත් කිසිම බයක් නැතුව තමන්ගේ මතය ප්‍රකාශ කරන කිං, මේ වගේ තහනම් කිරීම්වලට එරෙහිව දිගින් දිගටම හඬ නඟනවා. කොහොම වුණත්, මේ සියලු බාධක මැද ඔහුගේ රසිකයන්ට තවත් අලුත් පොතක් කියවන්න ලැබෙනවා. ඒ තමයි ඔක්තෝබර් 6 වෙනිදා එළිදැක්වෙන ‘අදර් වර්ල්ඩ්ස් දෑන් දීස්’ (Other Worlds Than These) කෘතිය. පොත් තහනම් කළාට ලේඛකයෙක්ගේ නිර්මාණශීලී ගමන නවත්වන්න කාටවත් බැහැ කියන එක තමයි මේ සිදුවීමෙන් පැහැදිලි වෙන්නේ.
Discussion & Feedback