ස්පේස් එක්ස් සමාගමේ දැවැන්ත ස්ටාර්ෂිප් රොකට්ටුවේ ඉහළ කොටස වන ‘ෂිප් 40’ යානය දින 24ක් පුරා ඉන්දියන් සාගරයේ පාවෙමින් පැමිණ අවසානයේ ක්‍රිස්මස් දූපත අසලට ආරක්ෂිතව ළඟා වුණා. පසුගිය ජූලි 24 වැනිදා අභ්‍යවකාශ ගත කළ මෙම යානය සාර්ථකව සාගරයට ගොඩබැස්සවීමට හැකි වුණත්, ඉන්පසු එය ගොඩබිමට රැගෙන ඒම ස්පේස් එක්ස් කණ්ඩායමට ලොකු අභියෝගයක් වුණා. මුහුදේ පැවති රළු ස්වභාවය නිසා මෙය අසාර්ථක වේවි යැයි බොහෝ දෙනා සිතුවත්, අවසානයේ ඔවුන් එය සාර්ථකව සන්සුන් ජල තීරයකට රැගෙන ඒමට සමත් වුණා.
මෙම සිදුවීම අභ්‍යවකාශ ඉතිහාසයේ ඉතා වැදගත් සන්ධිස්ථානයක් වන්නේ, ස්ටාර්ෂිප් යානයක් මෙලෙස හානියක් නොවී සම්පූර්ණයෙන්ම ආරක්ෂිතව සාගරයට ගොඩබැස්සවූ පළමු අවස්ථාව මෙය නිසයි. සාමාන්‍යයෙන් මෙවැනි පරීක්ෂණවලදී යානා පුපුරා යාම සිදුවන නමුත්, ෂිප් 40 යානය නොවෙනස්ව පවතින නිසා ඉංජිනේරුවන්ට එහි තාක්ෂණික දත්ත සහ තාප ආවරණ ගැන ගැඹුරින් අධ්‍යයනය කරන්න දැන් අවස්ථාව ලැබිලා තියෙනවා. මේ වන විට ස්පේස් එක්ස් ඉංජිනේරු කණ්ඩායමක් ක්‍රිස්මස් දූපත වෙත ගමන් කරමින් සිටින්නේ, යානය නැවත ස්ටාර්බේස් වෙත රැගෙන ඒමට පෙර එහි තත්ත්වය පරීක්ෂා කිරීමටයි.
ස්ටාර්ෂිප් කියන්නේ ලෝකයේ බලවත්ම රොකට්ටුව ලෙස සැලකෙන යානයක්. මෙය නැවත නැවතත් භාවිත කළ හැකි ලෙස නිර්මාණය කර තිබීම නිසා අනාගත අභ්‍යවකාශ ගමන්වලදී විශාල වෙනසක් සිදු කරාවි. ෂිප් 40 යානයෙන් ලැබෙන මෙම නව දත්ත, ස්ටාර්ෂිප් ව්‍යාපෘතියේ ඉදිරි පියවරයන් වඩාත් සාර්ථක කර ගැනීමට විශාල පිටුවහලක් වේවි.
Discussion & Feedback