ශ්රී ලංකාවේ උපන් දක්ෂ ඡායාරූප ශිල්පියෙක් වන ගෙමුණු අමරසිංහ, මෙවර ආසියානු ඇමරිකානු මාධ්යවේදීන්ගේ සංගමය (AAJA) විසින් පිරිනමන කීර්තිමත් ජාත්යන්තර වාර්තාකරණ විශිෂ්ටතා සම්මානයෙන් පිදුම් ලබා තිබෙනවා. මියන්මාරයේ පවතින දේශපාලන අර්බුද සහ එරට ජනතාව ප්රජාතන්ත්රවාදය වෙනුවෙන් සිදුකරන අරගලය පිළිබඳව ඔහු සහ ඔහුගේ කණ්ඩායම එක්ව නිර්මාණය කළ බහුමාධ්ය වාර්තාකරණ ව්යාපෘතිය වෙනුවෙන් මෙම ගෞරවය ඔහුට හිමිවුණා. යුද්ධය සහ ගැටුම් මධ්යයේ වුවද, මියන්මාරයේ කයා ප්රාන්තයේ ජනතාව නව රාජ්යයක් ගොඩනැගීමට දරන උත්සාහය ඉතා සංවේදී ලෙස ලොවට පෙන්වා දීමට ගෙමුණු සමත් වුණා.
කොළඹින් සිය වෘත්තීය ජීවිතය ආරම්භ කළ ගෙමුණු අමරසිංහ, මේ වන විට ඇමරිකාවේ වොෂින්ටන් නුවර කේන්ද්ර කරගෙන ජාත්යන්තර මට්ටමේ මාධ්යවේදියෙක් විදිහට කටයුතු කරනවා. මීට පෙර ඔහු ඇසෝසියේටඩ් ප්රෙස් (AP) සහ රේඩියෝ ෆ්රී ඒෂියා වැනි ප්රධාන පෙළේ මාධ්ය ආයතන සමඟ වැඩ කරමින් ආසියාව, නැගෙනහිර අප්රිකාව සහ ඇමරිකාව පුරා විසිරී ඇති මානුෂීය අර්බුද සහ දේශපාලන සිදුවීම් වාර්තා කර තිබෙනවා. ඔහුගේ කැපවීම සහ දක්ෂතාවය නිසාම මීට පෙර පුලිට්සර් සම්මානය සහ එඩ්වඩ් ආර්. මරෝ සම්මානය ඇතුළු ජාත්යන්තර සම්මාන රැසක්ම ඔහු දිනාගෙන තියෙනවා.
ශ්රී ලාංකිකයෙක් විදිහට ලෝකයේ මෙවැනි ඉහළම තලයේ සම්මානයක් දිනා ගැනීම අපේ රටටත් විශාල ආඩම්බරයක්. යුද ගැටුම් සහ අභියෝගාත්මක පරිසරයන් තුළ සිටිමින් ඔහු සිදුකරන මෙම සේවය, ලෝකයේ මාධ්ය ක්ෂේත්රයේ බොහෝ දෙනාගේ ඇගයීමට ලක්වෙනවා. ඉදිරියේදීත් ගෙමුණු අමරසිංහට මෙවැනි ජයග්රහණ රැසක් අත්කර ගැනීමට හැකිවේවායි අපි ප්රාර්ථනා කරනවා.

Discussion & Feedback