ශ්රී ලංකාවේ විදුලිබල ක්ෂේත්රයේ නව පරිවර්තනයක් ඇති කරමින්, මෙගාවොට් 300ක සූර්ය බලශක්ති ව්යාපෘතියේ පළමු අදියර පසුගිය ඉරිදා වේයන්ගොඩ ප්රදේශයේදී සාර්ථකව ආරම්භ වුණා. වරාය, සිවිල් ගුවන් සේවා සහ බලශක්ති අමාත්ය අනුර කරුණාතිලක මහතාගේ ප්රධානත්වයෙන් මෙම මෙගාවොට් 3ක ධාරිතාවකින් යුත් සූර්ය බලාගාරය ජාතික විදුලි පද්ධතියට එක් කළා. මෙරට විදුලි අවශ්යතාවය සඳහා පොසිල ඉන්ධන මත යැපීම අවම කරමින්, පුනර්ජනනීය බලශක්තිය දෙසට යොමු වීමේ රජයේ වැඩපිළිවෙළේ තවත් වැදගත් පියවරක් විදිහට මෙය හඳුන්වන්න පුළුවන්.
මෙම ව්යාපෘතිය සඳහා නවීන තාක්ෂණයෙන් යුත් ‘බයිෆේෂල්’ (bifacial) සූර්ය පැනල භාවිතා කර තිබෙනවා. මේවා මගින් පැනලයේ දෙපැත්තෙන්ම සූර්යාලෝකය ලබාගෙන විදුලිය නිපදවීමේ හැකියාව තියෙනවා. වාර්ෂිකව මෙගාවොට් පැය මිලියන 6.35ක විදුලියක් ජාතික පද්ධතියට එක් කිරීමටත්, කාබන්ඩයොක්සයිඩ් විමෝචනය ටොන් 4,340කින් අඩු කිරීමටත් මෙම ව්යාපෘතිය මගින් හැකි වෙනවා. පෞද්ගලික අංශයේ දායකත්වයත් ලබා ගනිමින් ක්රියාත්මක වන මෙම වැඩසටහන, 2030 වන විට රටේ බලශක්ති අවශ්යතාවයෙන් 70%ක් පුනර්ජනනීය බලශක්තියෙන් සපුරා ගැනීමේ ඉලක්කය කරා යාමට විශාල පිටුවහලක් වේවි.
මෙම ව්යාපෘතිවලින් ලැබෙන විදුලිය ජාතික පද්ධතියට බාධාවකින් තොරව එක් කර ගැනීම සඳහා විදුලිබල පද්ධතියේ නවීකරණ කටයුතුත් මේ වන විටත් සිද්ධ වෙමින් පවතිනවා. 2040 වන විට කාබන් උදාසීන රටක් බවට පත්වීමේ ශ්රී ලංකාවේ අරමුණ ජය ගැනීමට මෙම සූර්ය බලශක්ති ව්යාපෘති මාලාව ඉතා වැදගත් වන බවයි බලධාරීන් පවසන්නේ.

Discussion & Feedback