හෙට අලුයම ශ්රී ලංකාවේ අහසේ ඉතාමත් අපූරු දසුනක් දකින්න ලැබෙනවා. බුධ, අඟහරු, බ්රහස්පත,සෙනසුරු, යුරේනස් සහ නෙප්චූන් කියන ග්රහලෝක හය එක පෙළට අහසේ දිස්වෙන මේ අපූරු සංසිද්ධිය තාරකා විද්යාඥයන් හඳුන්වන්නේ ‘ග්රහලෝක පෙළගැස්මක්’ ලෙසයි. ආතර් සී. ක්ලාක් මධ්යස්ථානය පවසන විදිහට, හෙට අලුයම 4.30ත් 5.15ත් අතර කාලයේදී නැගෙනහිර ක්ෂිතිජයේ සිට දකුණු දෙසට මේ ග්රහලෝක පෙළගැසී තිබෙනු ඔබට දැකගන්න පුළුවන්. මෙයින් ග්රහලෝක හතරක් නිරුවත් ඇසින් බලාගන්න පුළුවන් වුණත්, යුරේනස් සහ නෙප්චූන් දැකගන්න නම් දුරේක්ෂයක් හෝ බයිනොකියුලර් එකක් අවශ්ය වෙනවා.
මේ අතර, අගෝස්තු 12 වැනිදා රාත්රියේ සිට 13 වැනිදා අලුයම දක්වා කාලය තුළ ‘පර්සීඩ්’ උල්කාපාත වර්ෂාවත් උපරිම මට්ටමට ළඟා වෙනවා. මේ දිනවල අහස ඉතාමත් අඳුරු නිසා පැයකට උල්කාපාත 100ක් පමණ ඉතා පැහැදිලිව දැකගන්න ලැබෙනු ඇතැයි බලාපොරොත්තු වෙන්න පුළුවන්. මේ අපූරු දසුන දැකගන්න නම් මධ්යම රාත්රියෙන් පසුව ඊසාන දෙස අහස දෙස බලා සිටීම ප්රමාණවත්. ඔබේ ඇස් අඳුරට හුරු කරගන්න විනාඩි 20ක් හෝ 30ක් පමණ අඳුරේ සිටීමෙන් වඩාත් හොඳින් මේ දසුන රසවිඳින්න පුළුවන්. කාලගුණය පැහැදිලි නම්, මේ දුර්ලභ අභ්යවකාශ සංසිද්ධි දෙකම එකම කාලයකදී දැකගන්න ලැබීම ඇත්තටම වාසනාවක්.

Discussion & Feedback