ලොව ප්‍රකට SpaceX සමාගම විසින් දියත් කිරීමට නියමිතව තිබූ ස්ටාර්ෂිප් (Starship) 13 වැනි අත්හදා බැලීමේ ගුවන් ගමන අවසන් මොහොතේ නතර කිරීමට සිදුවුණා. රොකට්ටුවේ ප්‍රධාන එන්ජින් 33ක් ක්‍රියාත්මක වීමට පටන් ගත් සැණින් එහි යම් දෝෂයක් හඳුනා ගැනීම නිසා මෙම දියත් කිරීම හදිසියේම නතර කිරීමට පියවර ගත්තා. මේ පිළිබඳව අදහස් දක්වමින් SpaceX සමාගම පවසා සිටියේ, රොකට්ටුවේ එන්ජින්වල ඇති වූ ගැටලුව නිවැරදි කර නැවතත් ගුවන්ගත කිරීම සඳහා සූදානම් වන බවයි. සමාගමේ ප්‍රධානී එලොන් මස්ක් පවසා ඇත්තේ, රොකට්ටුවේ තිබූ ර‍ැප්ටර් එන්ජින් දෙකක් ගලවා අලුත් ඒවා සවිකිරීමට සිදුවන බවත්, ඒ අනුව ලබන සඳුදා වන විට නැවතත් දියත් කිරීම සිදුකිරීමට බලාපොරොත්තු වන බවත්ය.
මෙම ස්ටාර්ෂිප් V3 රොකට්ටුව අභ්‍යවකාශ තාක්ෂණයේ නව පෙරළියක් ලෙස සැලකෙනවා. මෙවර ගුවන් ගමනේදී ස්ටාර්ලින්ක් V3 අන්තර්ජාල චන්ද්‍රිකා 20ක් අභ්‍යවකාශයට රැගෙන යාමට නියමිතයි. මෙම චන්ද්‍රිකා අතරින් සමහරක කැමරා සවිකර ඇති අතර, එමගින් රොකට්ටුවේ තාප ආවරණ පද්ධතියේ ක්‍රියාකාරිත්වය නිරීක්ෂණය කිරීමට බලාපොරොත්තු වෙනවා. පසුගිය වතාවේදී සිදුවූ සුළු දෝෂ මගහරවා ගනිමින්, මෙවර ගමන සාර්ථක කර ගැනීමට SpaceX ඉංජිනේරුවන් දැඩි උත්සාහයක නිරත වෙනවා. අභ්‍යවකාශ ලෝලීන් මේ වන විටත් ලබන සඳුදා සිදුවන මෙම දැවැන්ත දියත් කිරීම දෙස ඉතා උනන්දුවෙන් බලා සිටිනවා.
Discussion & Feedback