අභ්යවකාශ ගවේෂණ ඉතිහාසයේ තවත් සුවිශේෂී සිදුවීමක් වාර්තා වෙමින්, සඳ මත ගැටුණු SpaceX Falcon 9 රොකට්ටුවේ ඉහළ කොටස නිසා ඇති වූ දැවැන්ත ආවාටය සොයාගන්නට දකුණු කොරියාවේ ‘දනුරි’ (Danuri) චන්ද්ර ගවේෂණ යානය සමත් වෙලා තියෙනවා. පසුගිය බදාදා අලුයම මෙම රොකට් කොටස සඳ මතුපිට ගැටුණු අතර, දනුරි යානය එම ගැටුමට මිනිත්තු 30කට පෙර සිටම නිරීක්ෂණ කටයුතු ආරම්භ කර තිබුණා. ඔවුන් ලබාගත් ඡායාරූපවලින් ගැටුමට පෙර සහ පසු සඳ මතුපිට සිදුවූ වෙනස්කම් මෙන්ම, රොකට්ටුව ගැටීමෙන් විසිරී ගිය ද්රව්යවල සලකුණු පවා ඉතා පැහැදිලිව දැකගන්න පුළුවන්.
මෙම රොකට් කොටස කිලෝග්රෑම් 4,000ක් පමණ බරින් යුක්ත වන අතර, එය පැයට කිලෝමීටර් 8,690ක පමණ වේගයකින් සඳේ ගැටී තිබෙනවා. මේ නිසා මීටර් 27ක් පමණ පළල විශාල ආවාටයක් නිර්මාණය වී ඇති බවයි විද්යාඥයන් පවසන්නේ. සාමාන්යයෙන් මෙවැනි රොකට් කොටස් පෘථිවි වායුගෝලයේදී විනාශ කර දැමුවත්, මෙවර ඉන්ධන අවසන් වීම සහ ගුරුත්වාකර්ෂණ බලපෑම් නිසා එය සඳ දෙසට ඇදී ගොස් තිබෙනවා. දනුරි යානය ලබාගත් මෙම වටිනා දත්ත ඉදිරියේදී නාසා ආයතනයේ චන්ද්ර ගවේෂණ යානා සමඟ එක්ව ජාත්යන්තර පර්යේෂණ සඳහා යොදා ගැනීමට නියමිතයි. අභ්යවකාශයේ සිදුවන මෙවැනි ගැටුම් පිළිබඳව තවදුරටත් අධ්යයනය කිරීමට මෙම දත්ත විශාල පිටුවහලක් වේවි.

Discussion & Feedback