අභ්‍යවකාශ තාක්ෂණයේ දැවැන්තයෙක් වන SpaceX සමාගම පසුගිය බ්‍රහස්පතින්දා අලුයම තවත් සුවිශේෂී වාර්තාවක් තබමින් තම ෆැල්කන් 9 රොකට්ටුව 36 වැනි වරටත් අභ්‍යවකාශයට යැව්වා. ෆ්ලොරිඩා ප්‍රාන්තයේ කේප් කැනවරල් අභ්‍යවකාශ මධ්‍යස්ථානයෙන් උදෑසන 5:25ට පමණ මෙම රොකට්ටුව අභ්‍යවකාශගත කළේ ස්ටාර්ලින්ක් බ්‍රෝඩ්බෑන්ඩ් චන්ද්‍රිකා 29ක් පෘථිවි කක්ෂයට රැගෙන යෑමේ අරමුණින්. 1067 ලෙස නම් කර ඇති මෙම රොකට් බූස්ටරය මීට පෙර මෙහෙයුම් 35ක් සාර්ථකව නිම කර තිබීම විශේෂත්වයක්. අභ්‍යවකාශ ගමන් ඉතිහාසයේ වැඩිම වාර ගණනක් පියාසර කළ රොකට්ටුව ලෙස නාසා ආයතනයේ ඩිස්කවරි යානය වාර්තා තබා තිබුණත්, SpaceX සමාගම දැන් එම ඉලක්කය කරා ඉතා වේගයෙන් ළඟා වෙමින් ඉන්නවා.
මෙම මෙහෙයුමෙන් පසුව රොකට්ටුවේ ප්‍රධාන කොටස මිනිත්තු 8.5ක් ඇතුළත අත්ලාන්තික් සාගරයේ තිබූ ‘A Shortfall of Gravitas’ නම් යාත්‍රාව මත ඉතා ආරක්ෂිතව ගොඩබෑමටත් ඔවුන් සමත් වුණා. මේ වසරේ පමණක් ෆැල්කන් 9 රොකට්ටුව භාවිතයෙන් සිදු කළ 80 වැනි මෙහෙයුම මෙයයි. දැනට අභ්‍යවකාශයේ ක්‍රියාත්මක වන ස්ටාර්ලින්ක් චන්ද්‍රිකා සංඛ්‍යාව 10,700 ඉක්මවා ගොස් තිබෙන අතර, ලොව පුරා අන්තර්ජාල පහසුකම් පුළුල් කිරීමේ අරමුණින් මෙම චන්ද්‍රිකා ජාලය තවදුරටත් වර්ධනය කරමින් පවතිනවා. අභ්‍යවකාශ ගවේෂණ ක්ෂේත්‍රයේ මෙවැනි දියුණු තාක්ෂණික පියවරයන් ඉදිරියේදී තවත් බොහෝ විස්මිත දේ සිදු වීමට මග පාදන බව නම් පැහැදිලියි.
Discussion & Feedback