ලෝක ප්‍රසිද්ධ SpaceX සමාගම දැන් අභ්‍යවකාශ ගමන්වලට අමතරව කෘත්‍රිම බුද්ධිය හෙවත් AI තාක්ෂණය ඔස්සේ දැවැන්ත ආර්ථික විප්ලවයකට සූදානම් වෙනවා. සමාගමේ ප්‍රධාන විධායක නිලධාරී ඉලොන් මස්ක් පවසන විදිහට, ඉදිරි වසර කිහිපය තුළ SpaceX සමාගමේ සමස්ත වටිනාකමෙන් 99%ක්ම ලැබෙන්නේ AI තාක්ෂණය හරහායි. දැනටමත් ඔවුන් xAI වැනි ආයතන සමඟ එක්ව දැවැන්ත පරිගණක පද්ධති ගොඩනඟමින් සිටින අතර, ලබන වසර අවසානය වන විට ගිගාවොට් 10ක ධාරිතාවකින් යුත් AI පද්ධතියක් ක්‍රියාත්මක කිරීමට ඔවුන් සැලසුම් කරලා තියෙනවා. මේ හරහා වාර්ෂිකව ඩොලර් බිලියන 300 සිට 500 දක්වා ආදායමක් උපයා ගැනීමට ඔවුන් බලාපොරොත්තු වෙනවා.
මේ සැලසුම මෙතැනින් නතර වෙන්නේ නැහැ. ටෙක්සාස් ප්‍රාන්තයේ අති නවීන චිප් නිෂ්පාදන කර්මාන්තශාලාවක් වන ‘Terafab’ හරහා ඔවුන් ඉදිරියේදී තවත් දියුණු තාක්ෂණික මෙවලම් නිපදවන්න සූදානම්. ඒ විතරක් නෙවෙයි, අනාගතයේදී සඳ මත දත්ත මධ්‍යස්ථාන පිහිටුවා, ‘Starmind’ නමින් AI චන්ද්‍රිකා මිලියනයක් අභ්‍යවකාශයට යැවීමටත් ඔවුන් සැලසුම් කරලා තියෙනවා. මස්ක් කියන විදිහට, අනාගත ලෝකය සම්පූර්ණයෙන්ම රඳා පවතින්නේ AI සහ රොබෝ තාක්ෂණය මතයි. මානව වර්ගයාට හිතකර සහ උදව් කරන AI තාක්ෂණයක් නිර්මාණය කිරීම තමයි මේ සියල්ලේම අවසාන අරමුණ වෙලා තියෙන්නේ. මේ දැවැන්ත ඉලක්ක සපුරා ගත්තොත්, SpaceX සමාගම අනාගතයේදී ලෝකයේ වටිනාම සහ බලවත්ම ආයතනය බවට පත්වෙන එක නම් ස්ථිරයි.
Discussion & Feedback