ඇමරිකානු හිටපු ජනාධිපති ඩොනල්ඩ් ට්‍රම්ප් විසින් පසුගිය දිනක සමාජ මාධ්‍ය ඔස්සේ අභ්‍යවකාශ හමුදාව සඳහා නිර්මාණය කළ නව නිල ඇඳුම් කට්ටලයක් ප්‍රසිද්ධ කළා. මෙම ඇඳුම් නිර්මාණය කිරීමේදී 1997 වසරේ තිරගත වූ ‘ස්ටාර්ෂිප් ට්‍රූපර්ස්’ (Starship Troopers) නම් චිත්‍රපටයේ එන ඇඳුම්වලින් ආභාෂය ලබා ඇති බව ඔහු සඳහන් කර තිබෙනවා. අළු සහ කළු පැහැයෙන් යුත් මෙම නිල ඇඳුම්වල දණහිස දක්වා දිගු සම් බූට් සපත්තු සහ විශේෂ කරපටි ඇතුළත් වන අතර, එය හමුදා විනය සහ ක්‍රියාකාරීත්වය මනාව පිළිබිඹු කරන බවයි පැවසෙන්නේ.
කෙසේ වෙතත්, මෙම තේරීම බොහෝ දෙනාගේ විමතියට හේතු වී තිබෙනවා. මීට හේතුව වන්නේ එම චිත්‍රපටය ෆැසිස්ට්වාදය උපහාසයට ලක් කරන නිර්මාණයක් ලෙස එකල විචාරකයන් විසින් හඳුන්වා දීමයි. ට්‍රම්ප් මෙවැනි සිනමා නිර්මාණවලින් ආභාෂය ලබා ගත් පළමු අවස්ථාව මෙය නොවෙයි. මීට පෙර අභ්‍යවකාශ හමුදාවේ ලාංඡනය නිර්මාණය කිරීමේදීත් ‘ස්ටාර් ට්‍රෙක්’ (Star Trek) චිත්‍රපට මාලාවේ ලාංඡනයට සමානකම් දැක්වීම නිසා බොහෝ දෙනාගේ අවධානය යොමු වුණා. එමෙන්ම, අභ්‍යවකාශ හමුදාවේ සාමාජිකයන් ‘ගාඩියන්ස්’ (Guardians) ලෙස නම් කිරීමත් ‘ගාඩියන්ස් ඔෆ් ද ගැලැක්සි’ චිත්‍රපටය සිහිගන්වන බවයි බොහෝ දෙනා පවසන්නේ. කෙසේ වෙතත්, මෙම නව නිල ඇඳුම් පිළිබඳව අන්තර්ජාලය තුළ මේ වන විටත් විශාල කතාබහක් ඇති වී තිබෙනවා.
Discussion & Feedback