ලොවම කම්පා කළ 9/11 ත්‍රස්ත ප්‍රහාරයෙන් පසු නිව්යෝර්ක් නගරයේ මාෆියා කල්ලි කොහොමද අතිවිශාල මුදලක් හොයාගත්තේ කියන නොදන්නා කතාව අලලා අලුත්ම ශ්‍රව්‍ය නාට්‍යයක් එළිදැක්වෙනවා. ‘UnderGround Zero: 9/11 & The Mob’ නමින් නම් කර ඇති මෙම කතා මාලාවට ජනප්‍රිය ‘සොප්‍රානෝස්’ (The Sopranos) කතා මාලාවේ රංගන ශිල්පීන් වන මයිකල් ඉම්පීරියෝලි සහ ස්ටීව් ෂිරීපා ප්‍රධාන චරිත නිරූපණය කරනවා. ඔවුන් සමඟ රේ අබෲසෝ සහ ආතර් නස්කරෙල්ලා වැනි තවත් ප්‍රවීණ නළුවන් පිරිසක් ද මෙයට එක්ව සිටිනවා.
මෙම කතාව ගෙතෙන්නේ ට්වින් ටවර්ස් කඩා වැටීමෙන් පසු ඇති වූ අවුල් සහගත තත්ත්වය ප්‍රයෝජනයට ගනිමින් මාෆියා කල්ලි සිදු කළ මහා පරිමාණ වංචාවන් වටායි. සැබෑ සිදුවීම් පාදක කරගෙන නිර්මාණය කර ඇති මෙම කතා මාලාවේ පිටපත ස්ටීවන් ක්‍රොනිෂ් විසින් රචනා කර තිබෙනවා. තමන් නිව්යෝර්ක් වැසියෙක් ලෙස මෙම සිදුවීම අත්විඳි නිසා, මෙවැනි සංවේදී කතාවක් ඉදිරිපත් කිරීමට ලැබීම විශාල ගෞරවයක් බව මයිකල් ඉම්පීරියෝලි පවසනවා. මෙය හුදෙක් අපරාධ කතාවක් පමණක් නොවෙයි, පවුල, පක්ෂපාතීත්වය සහ පැවැත්ම පිළිබඳ ගැඹුරු කතාවක් බවත් ඔහු වැඩිදුරටත් සඳහන් කරනවා.
iHeartPodcasts සහ Thoroughbred Studios එක්ව නිෂ්පාදනය කරන මෙම ශ්‍රව්‍ය නාට්‍යය මේ වන විටත් අන්තර්ජාලය හරහා රසිකයන්ට අහන්න පුළුවන්. වසර 25කට පසු නැවතත් සොප්‍රානෝස් කණ්ඩායම සමඟ වැඩ කිරීමට ලැබීම සතුටක් බව නිෂ්පාදකවරුන් පවසනවා. 9/11 ව්‍යසනය මැද මාෆියාවේ කුමන්ත්‍රණ හෙළි කරන මෙම අලුත්ම අත්දැකීම අනිවාර්යයෙන්ම අහන්න වටිනා එකක්.
Discussion & Feedback