අභ්‍යවකාශයේ සැඟවී තිබිය හැකි න්‍යෂ්ටික අවි හඳුනා ගැනීම සඳහා විශේෂිත වූ කුඩා චන්ද්‍රිකා සමූහයක් භාවිතා කිරීමට විද්‍යාඥයන් පියවර ගනිමින් ඉන්නවා. මෑත කාලයේ රුසියාව අභ්‍යවකාශයේ න්‍යෂ්ටික අවි අත්හදා බලන බවට පැතිර ගිය කටකතා නිසා ලෝක බලවතුන් දැඩි කනස්සල්ලට පත් වුණා. විශේෂයෙන්ම යුක්රේන යුද්ධයේදී ස්ටාර්ලින්ක් වැනි චන්ද්‍රිකා ජාලයන් දක්වන දායකත්වය නිසා, එවැනි ජාලයන් විනාශ කිරීමට න්‍යෂ්ටික පිපිරීමක් සිදු කළහොත් පෘථිවිය වටා ඇති පහළ කක්ෂය වසර ගණනාවකට භාවිතයට ගත නොහැකි තත්ත්වයට පත්වෙනවා. මෙය ජාත්‍යන්තර අභ්‍යවකාශ මධ්‍යස්ථානයට සහ අනෙකුත් වැදගත් චන්ද්‍රිකා සියල්ලටම විශාල තර්ජනයක්.
මෙම තත්ත්වය වළක්වා ගැනීම සඳහා මැසචුසෙස්ට් තාක්ෂණ ආයතනයේ මහාචාර්යවරයෙක් වන අරෙග් ඩැනගුලියන් යෝජනා කරන්නේ සපත්තු පෙට්ටියක ප්‍රමාණයේ කුඩා ‘කියුබ්සැට්’ (Cubesats) චන්ද්‍රිකා සමූහයක් අභ්‍යවකාශයට යැවීමටයි. මේවායේ ඇති විශේෂ සංවේදක මගින් න්‍යෂ්ටික අවිවලින් නිකුත් වන විකිරණ හඳුනා ගැනීමට හැකියාව තියෙනවා. විශේෂයෙන්ම පෘථිවිය වටා ඇති වැන් ඇලන් විකිරණ පටියේදී න්‍යෂ්ටික ද්‍රව්‍යවලින් නිකුත් වන සුවිශේෂී සංඥා හඳුනා ගැනීම මගින්, සැක සහිත චන්ද්‍රිකාවක න්‍යෂ්ටික අවියක් තිබේදැයි තහවුරු කරගන්න පුළුවන්. අනාගතයේදී අභ්‍යවකාශයේ ආරක්ෂාව තහවුරු කිරීමට මෙම තාක්ෂණය ඉතා වැදගත් වනු ඇති බවයි විද්‍යාඥයන් පවසන්නේ.
Discussion & Feedback