මේ දවස්වල අන්තර්ජාලයම හොල්මන් කරපු ජනප්‍රියම යූටියුබ් භීෂණ කතා මාලාවක් වන ‘ද මැන්ඩෙලා කැටලොග්’ (The Mandela Catalogue) සිනමා පටයක් විදිහට ලොකු තිරයට ගේන්න හොලිවුඩයේ දැවැන්තයෝ සූදානම් වෙනවා. ස්කොට් ස්ටූබර්, ස්ටීවන් ස්පීල්බර්ග් සහ ඇමසන් එම්.ජී.එම් ස්ටූඩියෝස් එකතු වෙලා මේ අයිතිය දිනාගත්තේ චිත්‍රාගාර 11ක් අතර ඇති වුණු දැඩි තරඟයකින් පස්සේ. මේ කතාව නිර්මාණය කරපු ඇලෙක්ස් කිස්ටර්ම තමයි චිත්‍රපටයේ අධ්‍යක්ෂණයත් බාරගන්නේ. 2021දී පටන් ගත්ත මේ කතා මාලාවට මිලියන 100කට වඩා වැඩි නැරඹුම් වාර ප්‍රමාණයක් ලැබිලා තියෙනවා.
මේ කතාව දිවෙන්නේ මැන්ඩෙලා ප්‍රාන්තයට ඇතුළු වෙන ‘ඇල්ටනේට්ස්’ කියන අමුතුම ආකාරයේ ජීවීන් වටායි. මිනිස්සුන්ව මානසිකව වට්ටලා ඔවුන්ව සියදිවි නසාගන්න පෙළඹවීම තමයි මේ ජීවීන්ගේ ප්‍රධාන අරමුණ වෙන්නේ. ඇත්තටම ‘බැක්රූම්ස්’ වගේ යූටියුබ් හරහා ජනප්‍රිය වුණු නිර්මාණ සිනමාවට ගෙනල්ලා ලොකු සාර්ථකත්වයක් ලැබුවා වගේම, මේ චිත්‍රපටයත් තරුණ පරපුර අතර ලොකු ආකර්ෂණයක් දිනාගනීවි කියලා තමයි හොලිවුඩ් ආරංචි මාර්ග කියන්නේ. ස්පීල්බර්ග් වගේ දැවැන්තයෝ මේ වගේ අලුත් නිර්මාණකරුවෝ එක්ක එකතු වෙලා වැඩ කරන එක ඇත්තටම සිනමා ලෝලීන්ට ලැබෙන ලොකු අවස්ථාවක්.
මේ චිත්‍රපටය නිෂ්පාදනය කරන්නේ ඇම්බ්ලින් එන්ටර්ටේන්මන්ට් සහ පේපර් ස්ට්‍රීට් පික්චර්ස් ආයතන එකතුවෙන්. ඇලෙක්ස් කිස්ටර් සහ ටයිලර් ක්ලිෆ්ටන් එකතු වෙලා මේ සඳහා තිර රචනයත් ලියනවා. ඉතින් භීෂණ චිත්‍රපට වලට කැමති අයට මේක අනිවාර්යයෙන්ම බලන්න වටිනා නිර්මාණයක් වේවි.
Discussion & Feedback