කැනේඩියානු සිනමාවේ සහ රූපවාහිනියේ දැවැන්තයෙක් වුණු ප්‍රවීණ නළු ස්කොට් හයිලන්ඩ්ස් වයස අවුරුදු 83ක්ව තිබියදී අභාවප්‍රාප්ත වෙලා. ඔහු මියගිය බව ඔහුගේ පුත් ලූක් හයිලන්ඩ්ස් සමාජ මාධ්‍ය ඔස්සේ ඉතා සංවේදී සටහනක් තබමින් තහවුරු කර තිබෙනවා. තමන්ගේ පියා තමන්ගේ සදාකාලික වීරයා සහ හොඳම මිතුරා බවත්, මේ අහිමිවීම දරාගන්න බැරි තරම් වේදනාකාරී බවත් ඔහු පවසා තිබුණා. 1943 වසරේ කැනඩාවේදී උපත ලැබූ ස්කොට්, මුලින් සත්ව විද්‍යාව හැදෑරුවත් පසුව රංගන කලාවට යොමු වුණා. ඔහු 1965 වසරේදී තම රංගන දිවිය ආරම්භ කළේ නිව්යෝර්ක් නුවරදී වේදිකා නාට්‍ය හරහායි.
ස්කොට් හයිලන්ඩ්ස්ව ලෝකය පුරාම ජනප්‍රිය වුණේ ‘නයිට් හීට්’ (Night Heat) රූපවාහිනී කතාමාලාවේ ‘කෙවින් ඕබ්‍රයන්’ නම් රහස් පරීක්ෂක චරිතය හරහායි. දශක ගණනාවක් පුරා ඔහු ‘ෆාගෝ’ (Fargo), ‘ද එක්ස්-ෆයිල්ස්’ (The X-Files) සහ ‘සුපර්නැචුරල්’ (Supernatural) වැනි ජනප්‍රිය නිර්මාණ රැසකටම සිය රංගන දායකත්වය ලබා දුන්නා. චිත්‍රපට සහ ටෙලි නාට්‍ය රැසක විවිධ චරිත නිරූපණය කරමින් ප්‍රේක්ෂක ආදරය දිනාගත් ඔහු, රංගන ශිල්පියෙක් විතරක් නෙවෙයි අධ්‍යක්ෂවරයෙක් සහ ලේඛකයෙක් විදිහටත් කටයුතු කළා.
ඔහුගේ වියෝවෙන් පසුව බිරිඳ වෙරෝනිකා, පුත් ලූක් සහ දියණිය රෙබෙකා ඇතුළු පවුලේ සාමාජිකයන් මේ වන විට දැඩි ශෝකයකින් පසුවනවා. සිනමා ලෝකයට ඔහු කළ මෙහෙය කිසිදා අමතක නොවන අතර, ඔහුගේ රංගනයන් තුළින් ඔහු සැමදා රසිකයන් අතර ජීවත් වේවි. ස්කොට් හයිලන්ඩ්ස්ගේ අභාවය හොලිවුඩ් සිනමාවට ලොකු පාඩුවක් බවයි බොහෝ දෙනා පවසන්නේ.
Discussion & Feedback