අභ්‍යවකාශ විද්‍යාඥයන් විසින් සුපර්නෝවා තරු 3,000ක් පමණ අධ්‍යයනය කරමින් සිදුකළ නවතම පර්යේෂණයකින් විශ්වය පිළිබඳ අප සතු දැනුම උඩු යටිකුරු කරන සොයාගැනීමක් සිදුකර තිබෙනවා. සාමාන්‍යයෙන් විද්‍යාඥයන් විශ්වාස කළේ විශ්වයේ ප්‍රසාරණය වේගවත් කරන ‘අඳුරු ශක්තිය’ (Dark Energy) කාලයත් සමඟ වෙනස් නොවී ස්ථාවරව පවතින බවයි. නමුත් මෙම නව දත්තවලින් පෙනී යන්නේ අඳුරු ශක්තියේ බලපෑම කාලයත් සමඟ වෙනස් වෙමින් පවතින බවයි. මෙය විශ්ව විද්‍යාවේ මූලික සිද්ධාන්තවලට අභියෝගයක් එල්ල කරන කරුණක්.
මෙම පර්යේෂණය සඳහා ‘Type Ia’ ගණයට අයත් සුපර්නෝවා තරු දත්ත විශාල ප්‍රමාණයක් යොදාගෙන තිබෙනවා. සුදු වාමන තරු (White Dwarfs) තම සහකාර තරු වෙතින් ද්‍රව්‍ය උරාගෙන ස්කන්ධය සීමාව ඉක්මවා ගිය විට මෙවැනි දැවැන්ත පිපිරීම් සිදුවෙනවා. මෙම පිපිරීම්වලින් නිකුත් වන ආලෝකය විශ්වයේ දුර මැනීමට ‘සම්මත ඉටිපන්දම්’ ලෙස භාවිතා කරනවා. ක්වීන්ස්ලන්ත විශ්වවිද්‍යාලයේ පර්යේෂකයන් පවසන්නේ දශක තුනක තාරකා විද්‍යාත්මක නිරීක්ෂණ එකම රාමුවකට ගෙන විශ්ලේෂණය කළ විට, අඳුරු ශක්තිය ස්ථාවර නොවන බවට පැහැදිලි සාක්ෂි ලැබෙන බවයි. 2024 වසරේ DESI ව්‍යාපෘතියෙන් ලැබුණු දත්තවලටත් මෙය සමාන වන අතර, ඉදිරියේදී විශ්වයේ ආරම්භය සහ පරිණාමය පිළිබඳ අපගේ අවබෝධය සම්පූර්ණයෙන්ම වෙනස් වීමට මෙය හේතු විය හැකියි.
Discussion & Feedback