අපේ සූර්යයා තුළ රිදී ලෝහය ඉතා අඩු ප්‍රමාණයකින් තිබීම කාලයක් තිස්සේ විද්‍යාඥයන්ට ලොකු ප්‍රශ්නයක් වෙලා තිබුණා. සූර්යයාගේ බාහිර ස්ථරවල තිබිය යුතු රිදී ප්‍රමාණය සහ පෘථිවියට වැටෙන පැරණි උල්කාපාතවල (CI chondrites) තිබෙන රිදී ප්‍රමාණය අතර ලොකු වෙනසක් දකින්න ලැබුණා. මේක සූර්යයාගේ ඉතිහාසය ගැන අධ්‍යයනය කරන අයට ලොකු ගැටලුවක් වුණා. මොකද සූර්යයා සහ මේ උල්කාපාත නිර්මාණය වුණේ එකම මූලික ද්‍රව්‍යවලින් නිසා, ඒවායේ රිදී ප්‍රමාණය සමාන විය යුතුයි කියලා තමයි විද්‍යාඥයන් විශ්වාස කළේ.
දැන් බෙල්ජියමේ ලීජ් විශ්වවිද්‍යාලයේ සෙමා කලිස්කාන් ඇතුළු පර්යේෂකයන් කණ්ඩායමක් මේ අභිරහස විසඳන්න සමත් වෙලා තියෙනවා. ඔවුන් ස්වීඩනයේ සුපිරි පරිගණකයක් භාවිතා කරලා සූර්යයාගේ පරමාණුක ක්‍රියාකාරිත්වය ඉතා සංකීර්ණ ලෙස ආදර්ශනය කළා. කලින් කරපු පර්යේෂණවලදී මගහැරුණු ‘නොන්-ඉක්විලිබ්‍රියම්’ (non-equilibrium) බලපෑම් ගැනත් ඔවුන් මෙහිදී සලකා බැලුවා. මේ නවතම ගණනය කිරීම්වලට අනුව, සූර්යයා තුළ කලින් හිතුවට වඩා 55%ක් වැඩි රිදී ප්‍රමාණයක් තිබෙන බව තහවුරු වෙලා තියෙනවා.
මේ සොයාගැනීමත් එක්ක සූර්යයා තුළ රිදී අඩුයි කියන අභිරහස බොහෝ දුරට විසඳිලා තියෙනවා. මේකෙන් අපිට විශ්වයේ තරු පරිණාමය වෙන ආකාරය සහ රිදී වැනි මූලද්‍රව්‍ය මන්දාකිණිය පුරා බෙදී යන හැටි ගැන වඩාත් පැහැදිලි අවබෝධයක් ලබාගන්න පුළුවන් වෙනවා. විද්‍යාව කොයි තරම් දියුණු වුණත්, තවමත් අපේ සූර්යයා තුළ සැඟවුණු රහස් කොපමණ තිබේදැයි මේ පර්යේෂණයෙන් හොඳින්ම පැහැදිලි වෙනවා.
Discussion & Feedback