නාසා ආයතනයේ චන්ද්‍රා එක්ස්-රේ නිරීක්ෂණාගාරය මගින් අභ්‍යවකාශයේ අමුතුම ආකාරයේ වස්තූන් විශේෂයක් සොයාගෙන තියෙනවා. සාමාන්‍යයෙන් තරු පද්ධතිවලදී සිදුවන්නේ එක් තරුවක් තවත් තරුවකින් වායු උරා ගැනීමයි. නමුත් මේ අලුතින් සොයාගත් වස්තූන් ඉතා අඩු ශක්තියකින් යුත් එක්ස්-රේ විමෝචනය කරන අතරම, විශාල වශයෙන් පාරජම්බුල කිරණ පිට කරනවා. ඇන්ඩ්‍රොමීඩා සහ පින්වීල් මන්දාකිණි ඇතුළු මන්දාකිණි හයකින් මෙවැනි වස්තූන් 84ක් විද්‍යාඥයන් විසින් හඳුනාගෙන තියෙනවා. ඇලබාමා විශ්වවිද්‍යාලයේ මුස්තාෆා මුහිබුල්ලා පවසන පරිදි, මීට පෙර මෙවැනි හැසිරීමක් පෙන්වන වස්තූන් ගැන අප කිසිවක් දැන සිටියේ නැහැ.
මේවා ‘හයිපර්සොෆ්ට් එක්ස්-රේ ප්‍රභවයන්’ ලෙස හඳුන්වන අතර, ඒවා සොයා ගැනීම ඉතා අපහසුයි. මන්ද අභ්‍යවකාශයේ ඇති හයිඩ්‍රජන් සහ හීලියම් වායු ස්ථර මගින් මේවායේ පාරජම්බුල කිරණ අවශෝෂණය කර ගන්නා නිසයි. විද්‍යාඥයන් විශ්වාස කරන්නේ මේ වස්තූන් මන්දාකිණිවල තරු සෑදීමේ ක්‍රියාවලිය පාලනය කිරීමට සහ අයනීකරණ ගැටලු විසඳීමට උදව් වන බවයි. ඒ වගේම, සුදු වාමන තරු පුපුරා යන ආකාරය හෙවත් සුපර්නෝවා පිපිරීම් පිළිබඳව පවතින අභිරහස් විසඳා ගැනීමටත් මේ සොයාගැනීම මගින් විශාල පිටුවහලක් ලැබෙනු ඇතැයි ඔවුන් බලාපොරොත්තු වෙනවා. අභ්‍යවකාශයේ තවමත් අප නොදන්නා බොහෝ දේ සැඟවී ඇති බවට මෙය කදිම සාක්ෂියක්.
Discussion & Feedback