ලෝකයේ ප්‍රසිද්ධ සැටලයිට් රූපවාහිනී සේවාවක් වන ඩිෂ් (Dish DBS) සමාගම මේ වන විට බංකොලොත් භාවය ප්‍රකාශයට පත් කර තිබෙනවා. ඇමරිකාවේ හූස්ටන් නුවර අධිකරණයට මේ පිළිබඳව ලිපිගොනු භාර දී ඇත්තේ සමාගම මුහුණ දී ඇති දැවැන්ත ණය බර සහ නීතිමය ගැටලු හේතුවෙන්. දැනට වාර්තා වන පරිදි, සමාගමේ බැඳුම්කර හිමියන්ගෙන් 88%කගේ සහයෝගය ඇතිව මෙම ප්‍රතිව්‍යුහගත කිරීමේ සැලැස්ම ක්‍රියාත්මක කිරීමට ඔවුන් බලාපොරොත්තු වෙනවා. එචෝස්ටාර් (EchoStar) සමාගම සමඟ ඒකාබද්ධ වීමෙන් පසු ඩොලර් බිලියන 25ක ණය බරක් ඔවුන්ට දරා ගැනීමට සිදුව තිබීම මෙම තීරණයට ප්‍රධාන හේතුවක් වෙලා තියෙනවා.
කෙසේ වෙතත්, මෙම බංකොලොත් භාවය ප්‍රකාශ කිරීම නිසා පාරිභෝගිකයන්ට හෝ සේවකයන්ට කිසිදු බලපෑමක් සිදු නොවන බව සමාගම අවධාරණය කරනවා. ඔවුන්ගේ සේවාවන් සාමාන්‍ය පරිදිම ඉදිරියටත් ක්‍රියාත්මක වන අතර, මේ වසරේ ජූලි සිට සැප්තැම්බර් දක්වා කාලය තුළදී නැවත ශක්තිමත් සමාගමක් ලෙස නැගී සිටීමට ඔවුන් අපේක්ෂා කරනවා. විශේෂයෙන්ම රැහැන් රහිත විදුලි සංදේශ ක්ෂේත්‍රය වෙත අවධානය යොමු කරමින්, ඉදිරියේදී වඩාත් සාර්ථක ගමනක් යාමට සමාගම සැලසුම් කර තිබෙනවා. AT&T සමාගම වෙත සිදු කිරීමට නියමිතව තිබූ ඩොලර් බිලියන 20ක වත්කම් විකිණීමේ ගනුදෙනුව ප්‍රමාද වීම මෙම අර්බුදයට තවත් හේතුවක් වුණා. කෙසේ වෙතත්, මෙම ක්‍රියාවලිය අවසානයේ සමාගම වඩාත් ශක්තිමත් වනු ඇති බව එහි සභාපති චාලි අර්ගන් විශ්වාසය පළ කරනවා.
Discussion & Feedback